Wednesday, November 19, 2008

الشيشه علينا حق ...ياعزيزي كلنا قرني



مكان منه هاتعرف أد إيه في شباب في بلدنا كتير تافه وضابع ونفسه يوصل بس مش عارف وبيفرغ همه في نفس شيشه داخل وطالع أو بصه من تحت لتحت علي بنت معديه ماشيه بتدلع لابسه لبس مقلوع أصلاَ لكن كمان, هاتعرف شباب جدع أوي وفنان كمان لاعب جيتار مخرج وشاعر ممثل وكاتب ...علي كل لون شباب من كل الطوائف وأصحاب أفكار مختلفه وأنتماءات دينيه وسياسيه كتير إشي أخوان علي ملحدين وشباب 6 إبريل وشيوعين ووطني كمان وناس ملهاش في البتنجان أو عابر سبيل يعدي عليك وكمان لبان يمكن تشتري وتطلع غيظك فيه ..


البورصه ..أو بمعني أصح قهوة البورصه المعروف عنها أنها مكان للصحفيين وغيرهم هاتلاقي عيال عاملين زحمه بيبعوا مناديل ويترجوك تديلهم ربع جنيه ولا خمسين قرش او تديهم شويه شاي او حته بسكويت غنالهم أحمد عدويه زحمه يا دينا زحمه .. زحمه وتاهوا الحبايب زحمه ولا عادش رحمه مولد وصاحبه غايب ,اتنين بيلعبوا طاوله بصوت عالي كأنهم قاعدين في بيتهم كالعاده زي اي قهوه وفي الأخر في غالب وفي مغلوب.. صاحب القهوه شايفك من بعيد وهو بيك فرحان سعيد عنده صبي الضحكه ما بتفارقش وشه يخدمك بعنيه ولما يبصلك من تاني يطنشك مش عارفه ليه ؟ لكن تقدر تقول أنه مجرد تغيير عشان القعده ماتبقاش ممله


لو في ماتش كوره تتجمع الكراسي قدام التليفزيون ويبقي في متابعه شديده ومع اول جون تصرخ الناس بصوت عالي هيييييييييييييه وناس تانيه ولا هي هنا عامله نفسها بتتفرج وهي سانده ظهرها علي الحيطه بتصطاد بعنيها أي فريسه معديه والكلام ياعم من الودن دي للودن ديه


من المشاهد اللي المفروض انها مش غريبه الأتي :

---------------------------------------

الساعه 12 الظهر لما كانت البورصه لسه بتستفتح كان في بنت قعدت علي طرابيزه

لوحدها وطلبت نسكافيه وشيشه تفاح المهم صاحبها جه وسلم عادي بالأيد إنما إزاي وبتتكلم في ايه يا راجل البنوته أستغربت قوم أيه الواد عمل اللي عليه ووطي وباسها من الخدين وكده العمليه متعشيه وكله تمام ومش محتاج اقولك انها اللي طلبت ده و غصب عنك وانت قاعد جمبهم هاتشم ريحه التفاح وتدخن شيشه أجباري ..الولد ما اتكلمش كتير زيه زي معظم أولاد أدم انما البنوته تصدعك وتثبتلك حقيقه علميه

بحته أن البنات رغاااااااايه


فجأه واحده ست كبيره ومش محجبه كانت معديه قالت بصوت عالي حد هنا عايز أي حاجه ؟ أنا الكبيره بتاعة البلد دي أي حد عايز أمضيله شيك علي بياض وسألت سؤال مهم والكل كان مستغرب وبيبصلها اوي وبيسمعلها السؤال هو عارفين هامضيله شيك علي بياض إزاي ؟؟ ..محدش اتكلم فقالت هاجيب الشيك وأحط عليه البياض وضحكت ضحكه بسخريه بس شريره ومشييت والكل بيبصلها ويضحك


بالليل بقي في وسط شارع البورصه كده بنوته صغيره ما بين 15_16 سنه لكن الجسم فاير تسمعها تضحك تجبرك تبص وراك تشوف دي مين المهم تودي وشك الناحيه التانيه وتقول اللهم اغزيك يا شيطان شويه ويجي مجموعه شباب ويقعدوا تقوم هي وتشد واحد فيهم من شعره اللي مفلفله وتقوله بدلع يا مصطفـــــــــي يكتفي هو أنه يبصلها ويبتسم ويستغرب


راجل كبير في السن مع راجل تاني برضوا كبير بيتكلموا علي طرابيزه وبينهم شاب ابن اخت واحد فيهم الكلام في الأول كان هادي وكله تمام فجأه كل واحد فيهم قام وقال للتاني انت راجل ما بتفهمش حاجه ولا عارف حاجه وخال الشاب ضربه بالقلم وشتمه لانه كان سبب الخلاف مشي الشاب وبعد وطبعا البورصه كلها بحلقت وانا معاهم


في ذكري وفاة عرفات الرابعه اللي تم الأحتفال بها في صمت بسبب الإنقسام بين فتح وحماس تلاقي شباب كتير حتي من قبلها لابسين الشال الفلسطيني ومنهم اللي مش عارف حاجه لابسه وخلاص وكأن هو ده كل اللي يربطنا بفلسطين شال مش أكتر عديت بنوته لابسه نص وبنطلون جيينز لابسه الشال كان نفسي أسألها هو أنتي يا قمر تعرفي فتح وحماس طب تعرفي ايه عن عرفات ولا انتي لابسه الشال ده عشان سقعانه وبس؟؟


هاتلاقي راجل غلبان اووي كبير في السن يجي يعدي عليك وانت قاعد ع الطرابيزه ويحط بونبوني عشان تشتريه ومحدش بينفعه للأسف حتي أنا عارف طريقه كويس يرص البضاعه ويرجع يلمها من تاني ويحطها في الشوال اللي ورا ظهره ولما يمشي من غير حتي ما يبصثلك تلمح في عنيه نظره غريبه وعلي وشه ابتسامه محدش يعرف تفسيرها غيره


هاتلاقي الدول العربيه بوحدتها القويه اوي اوي وكمان الدول الأفريقيه وشعارنا كلنا الشيشه علينا حق والستات هناك رجاله شكلا بلا مضمون صدق اللي قال النساء قادمون والرجال ذاهبات وماتنساش القطط اللي هي عامل أساسي في البورصه.. يا عزيزي أحنا بنقدم قطه لكل مواطن ..وهاتلاقي كمان إجتماع ع الأرض لشويه عيال بيمسحوا الجزم بيقعدوا يشربوا سجاير ويتكلموا وده بالنسبه لهم هو الفاصل بين كل لفة شغل والتانيه بس الغريب بقي أن كلهم صعايده وفلاحين بعد كده هانقرا أحتكار الصعايده لمسح الجزم أشمعني يعني أحمد عز محدش أحسن من حد


أما بقي عن الحب والعلاقات الإنسانيه البريئه فكله موجود وعلي كل لون إشي بيضه وأشي سمرا وإشي شقرا كلمه من هنا علي كلمه من هنا وكله في التمام محدش واخد باله يا عزيزي كلنا قرني !!


ناس تعدي عليك في البورصه تحسسك أد ايه أنت ضعيف ومن أي ألم تتوجع رغم أن غيرك فيه اللي مكفيه وساكت وماشي بيتعلم ومش كده وبس ده بيكسفك قدام نفسك وقبل ما يسيبك ويفارق يسيبلك أبتسامه غريبه تحسسك اد ايه الدنيا ولا تسوي ياعم إرمي ورا ظهرك وعديها الناس لبعضيها


حتي كحك العيد موجود طول السنه في المدينه المنوره.... عايز تحلق عندك كوافير عم محمود هايرحب بيك ولما تخرج منه كلنا هانقولك نعيما ...رصيدك خلص وعايز تشحن كله موجود ..حتي لو عايز تشحن ولاعه السجاير بتاعتك موجود


من الأخر: عالم البورصه رغم ارتفاعه وأنخفاضه وعدم ثبات المؤشر فيه إلا أنه عالم لذيذ زيه زي غيره مليان عيوب قبل المميزات لكنه عالم لذيذ أخر حاجه يا راجل ده حتي الحكومه بتقعد ع البورصه


بس الجديد بقي أن في البورصه كل من له نبي يصلي عليه واللعب بالنار مش هزار لأول مره هاتشوف واحد بيحط السيخ والع في بقه وبيقول كلام وسط النار وكأننا في مولد السيد البدوي ساعتها هاتلاقي نفسك بتقول لوحدك حي

هانعمل أيه أكل العيش مر يا بلد


والبورصه علينا حـــــــق





إمضاء :


نــــــــــــــــــــاهد سمير

Tuesday, November 4, 2008

عـــــــــــابر سبيل



إحساس غريب يتملكني كلما نظرت لأعلي ...الرهبه والحزن والخوف والتمني كلها مشاعر تغتالني وتؤلمني ..أشكي وأبكي وأقص عليه المزيد والمزيد منها.. ينصت إلي ويجيبني وكأنه يشعرني برحمته وحنانه , نوره في السماء يملئ الدنيا عرشه يهتز لدموع اليتيم والمظلوم لا يمنعه عنه حجاب كل يوم نتأكد أنه أقرب ما يكون وأنه الملك القدير الكبير لا إله إلا هو ....

" الله "

لا أخاف إلا الله قديما كنت أخاف البشر ولكن ..تعلمت المزيد والمزيد ومازلت فكيف نخاف ممن يملك نفس قدراتنا !! وتجد السؤال يطرح نفسه بشده فيما يزيدون عنا ؟؟ وتظهر الأجابه فجأه .." لاشئ " فكيف نخاف إذن


جلست مع نفسي لأعيد ترتيب أوراقي وذكراتي فوجدت أخطاء فادحه في حق نفسي وقلبي وربي بكيت بشده وجلست في غرفتي التي هجرتها طويلا بعد أن كانت صومعتي التي أهرب إليها من الدنيا وما فيها ونظرت من الشرفه التي كنت أفتحها لآطل منها علي الغد ..فغدا لناظره قريب ..ورفعت رأسي لآعلي وكأنني علي كرسي الأعتراف وأقر له وأناجيه


ربي...أحبك عصيتك ومازلت أعصيك فأنا بشر ولكني أخطئ وأتوب وحدي في دنيا أصبحت كالغابه يملكها أسود يأكلوننا فردا وراء الأخر ولكني أقسمت بك يا حق ألا أترك حق لي " فما ضاع حق وراؤه مطالب " ..حلبه نتصارع فيها والبقاء أصبح للأقوي


ربي أعفو عني قوني و شد من أذري ...أحببت وهويت وتمنيت منزل صغير أصبح أنا أميرته أخاف علي أطفالي من قبل أن أراهم ولكنك معي ترشدني لدربي الصحيح فنجني يا ربي مما أستميت في أنتظاره وأترقبه لحظة بلحظه


أتسمح لي أن أناجيك اكثر ..أن أنظر لسماك ..وليلك البهيج , نهارك القريب وفجرك الوشيك ورزقك للعبيد قرأنك المجيد ووعدك الوعيد لكل كافر عنيد ..ربي أحبك وكل نقطة في دمائي تشهد لك بإيماني وأعتقادي بأنك الأحد الفرد الصمد ..ورب العرش المجيد


قلبي الذي بين جانبي تملكه وينبض بأسمك يا الله ها هو يخفق ويميل لحب جديد حب لم أراه من قبل حب يطير من شدته العقل ..إحساس رهيب يخترق جدران قلبي ليصل لكل صمام فيه ويتملكه حب قام بثوره داخلي وجلس علي عرش قلبي فرضيت به حاكم مستبد يملكني ويأسرني في عشقه لأذوب في هواه وها أنا ذا أتمناه


زوج و أب وأخ ورفيق للطريق


ربي ....أعابر سبيل أنا مر علي الدنيا وتمني العيش فيها.. سار في درب الحياه يتخبط في حاضرها وماضيها يبكي الكثير ويفرح القليل يتشبس في كل أمل يلقي في داخله رغبة في الحياه ..


عابر سبيل ..يطلب المأكل الطيب والشراب الحلال يطلب حب رب العباد يسير بلا تفكير ويستميت في الوصول لكل حلم بعيد أعمي ولكن نظرته للواقع أقوي وأفصح من نظرة البصير عقله يطير من كل ظلم ونهب من مغتال حقير ....عابر سبيل عرف معني الألم عندما فهم كل دابه وكل أمر صعب كان أو يسير عابر سبيل


كالحمام في نشر السلام

كالصقور في بناء القصور

كالنسور في عبور الجسور

وجهه كالغيوم لا تكاد تري ملامحه

فيلسوف كبير وعالم خبير في عيون البشر جاهل عقيم ربي أعابر سبيل أنــــــــــــــــا ..أم فرد ذليل زائدا علي الدنيا ميت لا محاله ؟؟؟


ربي أحبك فأجب سؤالي أنا العبد الذليل أرفع إليك يداي أرجوك وأتمني عليك أحبك ولا
أخاف ســــــــــواك





عــــــــــــابر سبيل



Sunday, October 26, 2008

مين قال حلال.. مين قال حرام.. مين يزود ؟؟






جائز شرعا ..كلمه بنسمعها كتير من الشيوخ والمجتهدين في الدين النطق بها سهل جدا إنما لو بصينا علي نتائجها هانلاقيها صعبه أووي ومؤثره فينا كمسلمين بتحركنا العاطفه ناحيه الدين ...




من أسبوعين استفزت ست يوم الجمعه مشاعر المسلمين كلهم الست دي هي " أمينه ودود " أمريكيه من أصل أفريقي وأستاذة الدراسات الأسلاميه بجامعه فيرجينيا كومنولوث الأمريكيه , وده لآنها خطبت في المسلمين وأمتهم في الصلاه في كلية ولفسون بجامعة إكسفورد البريطانيه ودي طبعا مش أول مره ....أول مره كانت في إحتفال " يوم المسلم " في الولايات المتحده في 8 صفر سنة 1426 هجريه وده طبعا سبب غضب المسلمين في كل الدنيا وأنتقدها نائب رئيس رابطة المسلمين في بريطانيا " مختار بدري "




وعلي النقيض طبعا كان في شخصيات كتير مشجعه لها وبيقولوا أن دي حريه وأنها مجتهده وعايزه تثبت حرية المرأه وأن لها الحق في الأمامه لان الدين بيساوي بين الست والراجل




المسأله بين الدفاع والهجوم وإحنا اللي في الوسط ويفضل السؤال هل ده جائز شرعا ؟؟؟ طب بلاش إحنا ...الناس اللي لسه داخله الأسلام اللي متعرفهوش هايقولوا إن هو ده الأسلام وهي دي المساواه أن الراجل والست يصلوا جمب بعض في مكان واحد وحتي الحائض تصلي عادي واللي يأذن للجمعه ست ومش محجبه كمان أنهي دين بيقول كده هي دي المساواه هو ده الاسلام ؟؟




قال رئيس مركز التعليم الاسلامي بأكسفورد الدكتور " تاج هارجي " واللي كان من رعاة الحدث :




" أن إقامه الصلاه دي هاتكون خطوه في الاتجاه الصحيح " وده طبعا لانه مؤمن أن الأسلام دين المساواه بين الجنسين , ومش بس كده ده الأدله هاتنهار علينا زي الصورايخ أن أمينه ودود صح وأحنا غلط ومنعرفش يعني أيه اسلام وطبعا ماتنساش اللقب الشهير " متخلفين " ...ومن الأدله اللي عندهم علي صحه الصلاه دي أن الرسول " ص" سمح لأمرأه انها تؤم المصليين رجاله وستات وأضاف كمان تاج هارجي أن بعض الستات بقوا بيتولوا الأمامه في دول كتير زي افريقيا وكندا والولايات المتحده وأن امينه ودود أول ست تعمل ده في بريطانيا وكأنهم ماشيين علي مبدأ اللي يغيير مننا يعمل زينا ومحدش أحسن من حد




علق يوسف القرضاوي وقال من خلال فتوي أصدرها في الدوحه : أن الخطوه دي تعتبر بدعه منكره




والشيخ سيد طنطاوي شيخ الأزهر قال أنه من غير اللائق أن الرجاله يبصوا علي جسم ست قدامهم وهما بيصلوا




علي العكس وصفها موقع الصحوه الأسلاميه أنها ست لها مكانه ومنزله عاليه وبتحاول تأكد علي منزله الست في الأسلام وحقها في الأمامه




وكان من الأراء المعتدله الأتي :




أن الدعوه للمساواه بين الراجل والست وإزاله كل الفوارق بينهم من الدعوات الكفريه وده لانها ضد كتاب الله والدليل علي كده كلام السيده العاقله أم مريم عليها السلام لما قالت : " وليس الذكر كالانثي " ...




وقال ربنا في كتابه العزيز " للذكر مثل حظ الأنثيين " وفي سنة رسولنا الكريم قال " كمل من الرجال كثير ولم يكمل من النساء إلا أربع " عشان كده ربنا مييز الرجال بمميزات مختلفه عن مميزات الستات ونهي كل واحد أنه يتمني اللي فضل به ربنا واحد منهم علي التاني




" ولا تتمنوا ما فضل الله به بعضكم علي بعض للرجال نصيب مما أكتسبوا وللنساء نصيب مما اكتسبن " صدق الله العظيم




الحريه في الزمن ده بقيت للكل ...كل واحد عنده فتوي بيقولها إشي بقي إرضاع الكبير أو إن التدخين حلال والبوسه بين الولد والبنت أو قتل الميكي ماوس لالالا وخلي بالك كمان أوعي مراتك تنام جمب الحيط اصل هو بالفصحي " حائط " وده معناه أنه مذكر وكده تبقي خلوه غير شرعيه ...والنقاب في السوق يبقي بعين واحده فاهمين , وأهو كله بيأثر علينا أحنا مش هما وبيلاقوا ألف وسيله ووسيله يعرضوا ده فيه ماهو إعلامنا بقي شعاره " الفرقعه " وبس ده غير الأجتهاد بقي مش قادره أقولك اللي بيجتهدوا كتير وعلي الله الثواب والعقاب ...




عشان كده هاتشوف كتير زي نوال السعداوي , أمينه ودود , صاحب فتوي إرضاع الكبير , وجمال البنا . واللي قتل الميكي ماوس وغيره وغيره وغيره وما خفي كان


أعظم




" دينا جه الدنيا غريب وهايمشي منها غريب "








سؤال لولبي بقي بيطرح نفسه بنفسه ...


هي دي الحريــــــــــــــــــــه ؟؟


هي دي المســـــــــــــــــاواه ؟؟


هو ده الديــــــــــــــــــــــــن ؟؟










أمضاء :






نـــــــــاهد سمير

Wednesday, October 15, 2008

أهو كلام والسلام




بتوحشني ...كل نظره من عنيك , كل لمسه من إيديك كل ضحكه مني ليك بتوحشني ...رغم كلامك القليل وصمتك الطويل بتوحشني ...أنفاسك مشيتك تفكيرك كل حاجه فيك بتزود أشتياقي ليك


رغم عيوبك الكتير رغم صبرك القليل وعتابك الطويل رغم كل ده سايب فيا أثر ولا يمحيه المطر مرت أيام وسهرت الليالي لسه في عنيك بداري شوقي ليك , علي طول في بالي ولا غبت عن خيالي


عارف يا قلبي أختارتك تبقي دربي , معاك عرفت ربي حلمت أخلف وأربي بتوحشني ... حلمت بيك تبقي زي البدر في تمامه زي الحضن في أمانه بس ياريتك تصون قربت ليك لاقيت الجنه في حضن بيت


مقدرش أقول كلام , ولا حتي أقول غرام لكن أنت أهو تمام ..فارس قلبي الهمام ده أنا شوفتك في المنام علي كل بيت بعدي , وفي وقت شده أهدي الاقيني بروح إليك وأشكي وأقولك ياريت ترجعلي تاني نبني الجنه في حضن بيت


فاكر يا عمري لما انا وأنت كنا ..قاعدين بنحلم ونرسم عمر جاي ..شوفت في عيونك كلمه نسيتها... كلمه يا عمري عن العهد اللي بينا , كنت أنت ساعتها جمبي فجأه قربت مني أنفاسك ساعتها حسيت كأني طالعه من جوه قلبي حلمت يا عمري أضمك وأبعد بقلبي لعالم التمني


للنيل أبص من شوقي ليك أفتكرك أحكيله عنك رد بشده وقال أحبك ...مش قادره أخبي ده حبك جوه قلبي صحيح ده ذنبي بس أعمل أيه ؟؟ ويا الربابه مشيت بغني لكل بيت عشق الصبايا يا بنات حيارا لا شوفت رد ولا جواب إلا العتاب


البحر شوفته كلمته مره ولما سألني رديت عليه موجوه كسفني رد بشوقه وقال بحبك وفجأه خدعني وثار عليا وسأل السؤال ......هو عريسك ؟؟ أنا قولت أاااااه فوق الفنار وقفت تاني وقولت أيوه عدي النهار وعنيه أماني بها بشوف بكره وأطوف بين الدروب ده انا فيه بدوب


بتوحشني ...ده انا كلي ليك قلمي يا عمري من شوقه ليك عن حبي يا ما قال كلام رغم الملام ... تصدق عشقتك حتي في فرحك ألمك وجرحك رغم إنك قاتلني وكمان هاجرني بس واحشني سمعت لوم وعتاب كمان عن حب كان لكن مازال أنا عشقي ليك فوق الخيال بتمني ترجع ...ولحبي تسمع... ولدمعي تشفع


سرقت مني قلبي و روحي وأنا بيك داويت دمعي و جروحي مشيت سنين ورغم الحنين جوايا لك ألفين سؤال ..منهم جبال فوق قلبي ساكنه و لأنفاسي سارقه


لسه عايزني ؟؟ لسه شايفني ؟؟ ولا خيال ...ذكري في رمال خطبتها انت وداسوا عليها كل الجمال ولا المحال رد السؤال ؟؟؟


أيوه واحشني





أمضاء :





ناهد سمير

Wednesday, October 8, 2008

محتاجه بشده أسمعه



مش عارفه ....


محتاجه بشده أسمعه

ياريت الزمن من تاني بقلبي يجمعه

وساعتها هاسمعه, والله هادلعه

مشتاقه ليه وبغيير عليه

ساعات كتير من شوقي ليه

اسرح بخيالي وانادي عليه

** **

ولا حد غيره رسم ضحكتي

ولا حد غيره سبب دمعتي

حرك اللي جوايا بقي جزء من حشايا

كان معايا وعارف كل النوايا كل الخبايا

قالها بحبك ..رديت عشقتك

كانت ملاوعه ومع أنفاسه طالعه كلمة كرهتك

أيوه كرهتك من كتر طيبتك

رغم إنه المحال..سأل السؤال

معقوله حبك كان كده ؟؟

عشق وغرام بالشكل ده !!

ما أستهلش أنا منك كل ده

حسيتها منه رديت عليه
طب ليه كل ده ؟؟

** **

لك ألف حق ..يا قلب دق وشاف ورق

بعيونه شق كل الطرق وساب وأفترق

عن قلب كان له حلم وأتخنق

كنت حلم ياما حاربت ألمسه

فستان جوه فاترينا حلمت ألبسه

عصفور جميل نفسي أحبسه
** **

وبرضوا مش عارفه

محتاجه بشده أسمعه

من تاني وألمحه

ياريت الزمن بقلبي يجمعه

أنا بس أشوفوه والله لأدلعه
إمضاء :
نـــــــــــاهد سمير

Saturday, October 4, 2008

!! الألم يبدأ بالفهم




قرأت وسمعت كثيرا أن الألم يبدأ بالفهم ولكن ............ كنت أكذب علي نفسي وأقول أن الألم يصبح أقوي وأشد عند الجهل بالأمور وتقل شدته عند العلم بها وذلك لأننا في بعض الأحيان نستطيع ان نداوي بعض المشكلات وبعض الجروح عند معرفتها .ولكني أكتشفت ان العكس هو الصحيح وصار الأمر أقوي وأصعب مما كنت أتصور فها هي الحياه مدرسة كبيره نتعلم فيها دروسا كثيره بعضها نرغب في تعلمه والبعض الأخر مفروض علينا وها هو يا عزيزي الدرس الأول ويتبعه دروسا كثيره لعلنا نستفيد .


الحلم : في داخلنا ولكنه سجين يحارب في ثنايانا ليستنشق عطر الحريه ولكن ليس من السهل الفوز بالمعركه


الحب : هيهات وهيهات فكل يوم يصير أبعد رغم رقتنا وطيبتنا إلا أن الحب هو كلمة نجهلها ولانستطيع قراءتها


الصداقه : كنز دفناه وجهلنا مسواه حتي وإن علمناه نفقده من جديد ولا نستمتع به إن صار بين يدينا


العمل : أصبح المكان الذي نبغضه وخزنه نأتي منها بالمال الذي يساعدنا فقط علي محاولة العيش عيشه كريمه


الأنسان : لغز كبير وبئر مليئ بالأسرار..إن سقطت فيه إما ان تجد النور في القاع أو تجد ظلام الأساطير


الفكر : لوح ثلج متجمد إن حاولت ان تجلعه مرنا كنت أول من يضحي به ويقتله فهو يسير بمبدأ من تعلم ديته أقتله


الحريه : ألوان مغريه في ظاهرها رعب وفي باطنها دفئ ..الحريه إمرأه متبرجه تطلب المساواه لتصير رجل بلا شارب ..الحريه سب علني ..الحريه نفس شيشه ترسم به العمر القادم ..الحريه كأس تتجرعه وتقول : أنا حر ما لم أضر وااااااااااااحسرتااااااااه


الرجل : متمرد شريد حائر عنيد ..عقل مدبر وقلب محتضر ..دموع جبيسه بين الجفون وقلب وحيد وسط الطريق ..أب صغير وطفل سكير ..خائن خطير بين الشرق والغرب عقله يطير بين الفاتنه المتدينه والراقصه عقله يسير


المرأه : اليوم لم نعد نعرف هل هي إمرأه أم رجل مستنير ..هل هي فتاه أم شبح في الحياه قلب جريح وجسد مستباح لكل كلب نباح ..العانس المتمرده العاشقه المستدرجه.. الماكره الحائره بين العقل والجسد والشوق والحسد ..التابعه المتسلطه ..الكاتبه المتفتحه هي الكائن الغريب هي سر الحياه الذي يحركك للموت الأكيد


الوحده : كنز دفين به نستهين ..شعر رزين نخطه علي السطور لنكتب الدواوين درس في الحياه لا نعلم منتهاه ..أحيانا نترجاه , صديق عزيز يحرمك من كل غالي وعزيز يعلمك الأشتياق لكل محبوب وشريك في عمر فات , ترجمه حرفيه لكلمه إنسان أصبح في طي النسيان


الأنتقام: هو شبح الأنهزام


المناجاه : شط النجاه


البحر : مفكر حكيم وعاقل فريد في عالم اليوتوبيا الفقيد


أنا : بين السماء والأرض أكون أو لا أكون


الفن : مسخ يحاولإستعادة الجمال ..مسافر عنيد شد الرحال شكل بلا مضمون عاقل وسط الجنون عالم من المجون طلاسم وتخاريف عالم من الزييف.. في قديم الزمان أغاني وإنسجام وكان ياما كان علي عالم الأحلام عالم الأنغام تعزفها الأصنام مسرح كبير مليئ بالأساطير مالها من بدايه ومالها من نهايه ..


.مصر : بلد يخرج من ثوب السنيه لترتمي في أحضان العلمانيه لمحاربة الشيوعيه أينعم يا عزيزي فهي عالم بلا هويه


.فاللألم يا عزيزي يبدأ بالفهم





إمضاء :


نـــــــــــــــــــاهد سمير

Thursday, September 25, 2008

بيوت من ورق




نعم ولما الأندهاش ..فنحن نسكن في منازل من ورق شكلا بلا مضمون إذا نظرت إليها من بعيد تغمرك سعادة لم ولن تشعر بها ثانية , ولكنك إذا دققت النظر ودخلت وتعمقت في منازلنا لن تجد لها أساس فهي شكلا بلا مضمون ......
تبهرك منازلنا ولكن ذلك لفترة قصيره ومن بعدها عندما تتفهم الوضع ستشعر باللألم وذلك ليس كلامي فالحكماء قديما قالوا :
" إن اللألم يبدأ بالفهم "

نحن الأجيال نتفاوت بين الكبار والصغار ..يضمنا منزل واحد وكأن الله يختبرنا هل سنفهم حكمته أم لا , جعلنا سبحانه عز وجل مختلفين في العقول والفكر والطباع رغم أن دمائنا واحده وجعلنا نجلس معا في مكان واحد ليري هل سيستوعب كلا منا الأخر ويتفهمه أم سيبذل كلا منا جهده في القضاء علي الأخر ؟؟

وأعتقد أنك تعرف الأجابه .....

الأباء والأمهات في بلادنا تراهم يأمرون أبناؤهم بعدم الكذب وأن يتمرنوا دائما علي قول الصدق وهم أول من يكذبون ..يعلموننا النظافه وأنها من الأيمان ولكنهم لا يفعلون ما يقولون وستجد منهم الأطباء والمهندسين يلقون بالقمامه في شوارع بلادنا بكل فخر وفي نفس الوقت يأمرون أولادهم بالنظافه وستجد أيضا مناور منازلهم مليئه بالقمامه وفي النهايه هم أطباء ومهندسين وهذا ما يطلقون عليه اسم " ثقافة التخلف "..يطالبون بالحريه في الخارج وهم رواد الديكتاتوريه في الداخل ...فاقد الشئ لا يعطيه

وإن تحدثنا نحن الشباب معهم وتناقشنا يكون الرد : من تكونوا أنتم لتنطقون إلزموا الصمت نحن من يقرر نحن من يأمر وعليكم السمع والطاعه , أنتم التافهين بلا عقول تأكلون وتشربون تمرحون وتموجون لاتفعلون شئ سوي الجدال وكما تري يا عزيزي ...هذه هي نهايه الحوار الديموقراطي بينا نحن الأبناء وبين الأباء صراع لا ينتهي ...وفجوه كبيره داخل منازلنا تتسع يوما بعد يوم
فهي بالفعل منازل من ورق إذا جاءت ريح شديده ستهدمها وإذا سقط المطر سيغرقها ....

أتسأل كثيرا أين الحب الذي ندعوا إليه ليل نهار في منازلنا ؟؟
أين القيم والمبادئ هل هي شعارات ندعوا إليها ونحن أول من يتجاهلها ؟؟
أين الحريه في الداخل ؟ أين العدل ؟ نعيب علي الكبار في بلادنا ممن يتقلدون مناصب سياسيه وإجتماعيه رغم أننا في مناصبنا الصغيره نفشل في إدارتها

ننظر للأخر ونسينا أن ننظر لأنفسنا نشعر وكأننا ملائكة ترفرف بأجنحتها والأخر هو الشيطان اللعين الذي يهددنا ويجب أن نقومه وننقده وأحيانا نجلده حتي يقر ويعترف أنه خاطئ في كل شئ ..ونحن دائما علي صواب !!

الحياه الأجتماعيه في مصر ...حالتها سيئه فهي داخل غرفة الأنعاش تطلب منك ومن غيرك قبل أن تطالب بالحريه وبالديموقراطيه في الخارج أن تصنعها أولا بالداخل ...أن تبني الأنسان الذي يحقق لك الحريه والديموقراطيه بناء صحيح ولا تجعل منه مريض نفسي لا يعرف أين يذهب ولا مع من يتحدث رغم أن بجانبه الحضن والدفئ ولكنه أبعد ما يكون عنه ..لتصبح النتيجه أننا غرباء بداخل الوطن الأصغر وهو منزلنا وأيضا غرباء في الوطن الأكبر " مصر "

عزيزي القارئ اسمح لي أن اطرح عليك سؤال ...كم مره من المرات جلست مع عائلتك تتناقشون وتضحكون من القلب ؟؟ كم مره أرتميت في حضن والدتك بلا خجل ؟؟ كم مره نظرت إلي أهلك وقولت لهم أحبكم رغم كل شئ ؟؟
كم مره يا عزيزي جلس معك والدك ليسألك عن أحلامك وعن مستقبلك كيف ترسمه ؟؟
وعلي النقيض كم مره شعرت بالوحده والغربه في وسط أقرب الناس إليك ؟؟
فقدنا المعاني والأحساس بها... ندعوا إليها رغم أننا لم نتذوق طعمها ..لا نعرف معني الأمومه الصحيح ولا مفهوم الأبوه بمسئولياتها الضخمه فكفي عزيزي القارئ بالمرئ أن يضيع من يعول ...حتي الأخ والأخت صاروا أبعد ما يكون إن الدوله الصغيره داخل منازلنا أصابها زلزال ...حتي عندما حاولنا نحن الصغار أن نصعد لعقول الكبار بعد رفضهم للنزول إلي عقولنا ...للأسف فشلنا
وهذا ليس بتعميم ولكننا نتكلم عن معاناة عدد كبير منا ونعلم أن هناك نماذج مشرفه أباء وأبناء ...ولكننا نسلط الضوء علي الشئ البغيض ليصير كمان نتمني فنحن من يملك الغد شئنا أم أبينا

أدعوا من هنا من هذا المنبر أن نعود نحن البشر لطباع البشر من جديد ..شعرت كثيرا أنه ليس الأبناء من يحتاج للتربيه ولأعادة التأهيل بل الأباء هم من يحتاجون إليها لتصير منازلنا منازل بمعني الكلمه شكلا ومضمونا
وليست منــــــــــازل من ورق


إمضاء:


نــــــــــــاهد سمير

Wednesday, September 10, 2008

كده كده ميت ..!!






.....ما أنا كده كده ميت




جرح كبير بينزف جوايا وجواك وده من يوم السبت اللي فات ..أكيد عرفت أنا بتكلم عن إيه ؟؟


قالوا كتير إن مصر بتقتل نفسها قبل ما غيرها يقتلها وبتنهار جزء ورا جزء يعني بتعمل بالمثل اللي بيقول " بيدي لا بيد عمرو " لكن أنا مش متصوره إن بلدنا العروسه تعمل كده في نفسها وفي ولادها دي طول عمرها قويه وبتقاوم وبتقع وتقف من تاني مش سهل تتكسر كده


حادثة الدويقه كارثه بكل المقاييس يمكن فعلا يكون الغلط مشترك بين الحكومه والأهالي لكن غلط الحكومه أفظع بمراحل ومانقدرش كشعب له حق إنه يعيش في أمان جوه بيت من أربع حيطان وينام مستريح ومطمن إن سقف بيته هايقع عليه وعلي ولاده إننا مانعترضش علي الوضع , إنما ليه إحنا كشعب مش بنلحق نستريح ولا نفوق هو إحنا منحوسين ولا مقري علينا ولا إيه ؟؟


مره قطرات تولع وتخبط في بعضها ومره عباره ومره حريق الشوري اللي شمت فيه ناس كتير ودلوقتي وبلا فخر حادثة الدويقه ,وأهالي وضحايا حقهم في العباره راح هدر ومن تاني أهو بنشوف ضحايا بيضيعوا ويروحوا في الوبا وين هنادي يا أماي ؟؟..الدويقه فجرت حزن كبير ملحقش يهدا الساعه 10 الصبح ركن من أركان مصر قرر ينهار علي ولادك يا مصر أبويا وأبوك وأخواتنا ضاعوا وضاعت معاهم كل حاجه تحت أطنان من الصخور الناس من الفزع كانوا بيجروا ويصرخوا رجاله قبل الستات صخور كتلتها 10 طن قررت تخلص علي شويه من الشعب كل ذنبهم علي حد قولهم إنهم قعدوا في مكان هما عارفين كويس إنه هاينهار لكن يا صاحبي مفيش بديل كده ميت وكده ميت ...


أهالي كتير ماتوا وعلي حسب الأقوال الضحايا 34 قتيل , و53 مصاب والبقيه تأتي ..تيجي تسأل وتقول ليه الأهالي رغم إنهم عارفين إن الجبل هايقع عليهم قعدوا في البيوت دي هاسيبك بقي تقرا كلام واحد منهم رد قال ايه ؟؟


" كنا عارفين إنه هايقع بس معندناش بديل "


واللي لازم تعرفه إنه كالعاده في بلدنا إتقدم أبحاث كتير للحكومه عن كارثه هاتحصل في الدويقه وطبعا الحكومه الحمد لله الحمد لله ربنا ما يقطعلها عاده ولا هي هنا ووقعت الكارثه اللي ضحيتها انا وإنت وغيرنا ...سؤال مهم هي بلدنا بتنـــــــــــــهار بجد ؟؟


طبعا كان في نقل للمصابين وده يعلق وده يشجب وده يوعد وغيره وغيره وأهو كله كلام وصلوا بقي يا صاحبي إن هايبقي في 4 ألاف وحده سكنيه هاينقلوا فيها أهالي الدويقه خلال 3 أسابيع ..طب والمساكن دي كانت فين قبل كده ؟؟....5 ألاف جنيه من محافظ الفيوم لأهالي الضحايا ها مين يزود ؟؟..صباح الأحمد بيعزي الريس في ضحايا الدويقه وإحنا بقي مين يعزينا ؟؟ , ومين يعزي مصر في ولادها هي مش مصر دي أمي ولا إيه النظـــــــــــام ؟؟..وبرلمانيين بيطالبوا بعقد جلسه للجنه الإسكان الله ينور


انا لما شوفت الحادثه حسيت إن بلدنا هاتفضل لابسه أسود فتره كبيره عيون الأهالي حقيقي تقتلك جواها ألف علامه تعجب وإستفهام كفيله تهزك وتزلزلك ...لما تشوف صرخه أوووي من جوه من الراجل قبل الست وأطفال بتصرخ عايزه حد يلحقها من تحت الصخور وبيقولوا إلحقونا ...غيتونا يا ناس

بس ملوظه : برضوا يا جماعه إحنا الغلطانين ...إنت يا مصري الغلطان حد قالك تروح تسكن عند جبل هايقع عليك يعني كل الشقق الرخيصه دي والتسهيلات الفظيعه دي لالا إنت اللي مش بتتعلم ولا هاتتعلم يعني مش بتعرف تعوم وعدنهالك في حكايه العباره ورايح تغرق نفسك وتقول إحنا السبب وهجره غير شرعيه وطلعت سفيه وبرضوا عديناها إنما رايح تسكن جمب جبل هايقع هايقع لا كده بقي إنت ذنبك علي جمبك

بس إطمنوا إطمنوا المفتي قالها :


" الضحايا والموتي شهــــــــــــــــــــــداء " واء واء ده انا كده اروح أرمي نفسي تحت الجبل سمعني سلام صعبت عليا نفسي


ما أنا كده كده ميت


أنا المصري الشهيد كده كده ميت
أمضاء:
نــــــاهد سمير


Sunday, September 7, 2008

_- ياريتني ما جيت -_



ياتري العيب في الزمن ولا فينا

إحتارنا علي إجابه ما لاقينا

عيله كبيره أب وأم وأطفال نايمه

دنيا وفانيه والحاله أهي مايله أرد وأقول :

ياريتني ما جيبت

لاعندي المال

ولا ملكي جمال

مشيت رحال

وطلعت جبال

وبعد ده كله أنا طفل صغير

***

كتير بتحير وفي عمري بدور علي حته امان

وفي وسط زحام مالقتش مكان

دي قلوب قاسيه تقولي جبان وبتاع إدمان

وبشوه بلدي وأرضي وعرضي

من جوه بقوله :

ده أنا الغلبان لا لاقيت عنوان ولا حتي بيبان وراها أنام

وأعيش في أمان

رصيف وبنام وزباله أكوام أتغدي أتعشي و كله تمام

ما يفوتني مقام , والله ده عالم ولا في الأحلام

ويردوا يقولوا

ده طفل شوارع لاء بقي ده انا زارع

جوه قلوبكم ذنب كبير

ده أنا طفل صغير من غير أحلام

محناج الوان وأكون فنان

سرقتوا الحلم و من جوه القصر تردوا تقولوا:

تشويه ولأيه ؟ لشوارع مصر !!

وبقولها بحسر : ده سرقه ونهب لعمري

وقلبي وكل ده كله سببلي الكسر

أسرق أنهب وبغمض عيني يمكن أرجع

جوه البيت مع أب وأم وعيال نايمين

بشوق حاضنين بكره وبعده والعمر الجاي

واهو بكره بتاعي وافقت قبلت بكره بتاعي

***

أنا نفسي اموت لو كنت هافوت والكوره أشوط وأجيب الجون

ده كتير والله تشويه تخريب وكمان تغريب

جوايا ده كله ؟؟

وأنا جوه الدنيا يارتني ما جيت

لو كنت أختارت لقولت وعدت

ما تخادني يارب

ياريتني ما جيت ع الدنيا في يوم ولا عديت

وفجأه أنهارت وبلساني نطقت

ده أنا طفل صغير واقف متحير

من زمن أتغيروالله يا اخوانا

ده أنـــــــــــــا طفل صغير





أمضاء :



نــــــــــــاهد سمير

Friday, September 5, 2008

أطفال الشوارع000تحييكم



أنا هاتكلم عن أطفال بنشوفهم أنا وأنت في كل شوارع مصر بكل طوائفها ,وبنشوفهم في الأنفاق وفي محطات القطارات00



وفي أكوام الزباله ومناطق تانيه كتيييييييييير 00ها عرفت هما مين؟00برافوا عليك هما أطفال الشوارع 0تعرف أنا ساعات بسأل نفسي هما ليه سموهم أطفال الشوارع ليه اللقب ده بالذات ؟ لكن لقيت إن هو ده الأسم اللي ممكن يحسسك أد إيه الأطفال دول بيعانوا ,وكمان إنهم اتظلموا من أهل بيتهم ده إذا كان عندهم أهل أو بيت أصلا,أو أن الشارع في بعض الأحيان بيبقي أحن علي الأطفال دول من أهاليهم 0


زمااااااان وأنا لسه بكون شخصيتي أو لما كان عقلي لسه ما اتوسعش وعرف حاجات كتيييييير ماكنتش يعرفها كنت ,بخاف من الأطفال دول وبقرف منهم وبشتمهم وبلاوي تانيه كتيييييييير وأكيد مش أنا لوحدي اللي ماكناش نعرف حجم المأساه اللي بيعشها الأطفال دول "جحيم ما بعده جحيم"00أطفال اتسرقت منهم طفولتهم في لحظه من غير ما يحسوا ولا حتي يدوهم خبر00إيه الهبل ده هو في حرامي قبل مايسرق بيقول للي هايسرقه حاسب لحسن هاسرقك,...المهم الأطفال دول شابوا قبل الأوان عرفوا اللي أنا وإنت منعرفهوش ويمكن نعرفه لما يبقي عندنا 40 أو 50 سنه كده ان شاء الله00شوفت أد إيه هما مظلومين في مجتمع قلبه حجر مجتمع أخرس وأعمي وبلا عواطف ولارحمه علي فلذات كبده أرق ما خلق الله وهم الأطفال00تشوفهم في أكوام الزباله نايمين أو بيلموا الزباله والورق وعلب الكارتون بيدخنوا سجاير محشيه أو بيشربوا برشام , وتشوفهم تحت الكباري بيشموا الكله أو بيضربوا حقن ,تشوفهم نايمين علي سلالم الجامعه متغطيين بجرانين في عز البرد أو نايمين تحت العربيات أو ع الرصيف مش مهم مبيهمهومش منظرهم قدام الناس ولا حتي قدام نفسهم , المهم يناموا انشاله في بق الأسد, أما بيتعرضوا لأيه بقي 00ده موضوع تاني خاااااااااااااااااااااالص!!!!!!!!


خد عندك ياسيدي بيشتغلوا في أعمال الكبار مايتحملوهاش وبينضربوا من كل واحد في الشارع شويه بيتبهدلوا من اللي راكبين العربيات في الأشارات وشتايم من اللي قلبك يحبها,وبيتقبض عليهم ويترموا في البوكس كل شويه اشتباه وتسول أو تشويه لشوارع مصر اللي هي مشوهه أصلا وفي القسم يحصل مالا يحمد عقباه بيضربوا ويتشتموا ويترموا في الحجز ويتعلموا جوه الحجز كل اللي ممكن يجي في بالك واكتر شويه من فنون الأجرام 000أوعي تنسي إننا بنتكلم عن أطفال مش ناس كبيره 00
وبره السجن بيسرقوا وبيغتصبوا من ناس أكبر منهم وبيتقتلوا ويترموا من فوق القطارات أو يموتوهم وياخدوا اعضائهم وغيره كتييييييييييييييييييير وفي الأخر بنقول عليهم أطفال 00أطفال ايه بقي انتوا خليتوا فيها أطفال دول عواجيز لأكتر مني ومنك المجتمع ضحي بهم وخلاهم كبش فدي 000ورغم كل ده محدش في المجتمع بيحل المشكله ده يمكن يكونوا بيعقدوها أكتر طب أنت قولي النوادي الصباحيه اللي بيروحوها دي فايدتها إيه غير إنهم بيروحوا ياكلوا ويشربوا ويلعبوا ماشي كل ده ماشي إنما في أخر اليوم بيروحوا للمشكله من تاني الشارع ويناموا فيه يعني كأنك يا أبو زيد ما غزيت ولا لها أي فايده ... أو ممكن نقول في ناس بتحاول بس قله قليله مش قادره أقولك بيصعبوا عليا أد إيه وأكيد بيصعبوا عليك أنت كمان , انا ببكي عليهم بدموع قلبي قبل عيني نفسي اساعدهم بس مش عارفه إزاي عايزه أعمل حاجه بدل ما أنا بتكلم وبس أوعدك إني هافكر في حل أو حاجه اشارك بها علشان أحل المشكله دي وأحاول اخفف الجحيم اللي هما عايشين فيه ده0


أطفال الشوارع تحييكم وبتقولكم نحن هنا وكله تمام يابلدنا كله تمام ياريس كله تمام يامصر!!!!

Wednesday, September 3, 2008

وزاره للبوس يا مواطن.. يا بلاش !!


برنامج وزاره ماتمت علي قناة موجه اللي مازلت بنقدها في حاجات كتير مش لازم نذكرها دلوقتي ومقدمه عزت أبو عوف فكرته :

بتقولك

وبتقول لبافي الشعب اللي العبده لله برضوا منه لو الحكومه بين إيديك وأتعينت رئيس وزرا..ياتري هاتبقي شايف العمليه ماشيه إزاي ؟؟وهاتحط مين وفين وليه ؟؟ياتري عندك حلول لأزمة الأسعار اللي ليل نهار تشتكي منها ولا أنت معترض علي طول الخط وبس وأيه الوزرات اللي هاتشيلها وتنسفها ؟؟ عملا بمبدأ أنسف حمامك القديم وإيه الجديد اللي عندك ممكن تضيفه للوزرات ولا أنت علي قديمو يا معلم ؟؟

بصراحه الفكره حلوه بس ياتري ممكن تطبق؟؟


:المهم


أول حلقه كانت سميه الخشاب وبصراحه كانت لطيفه جدا وأقتراحتها كانت كويسه بس أهم ما قالته عن المرور والصحه ومستشفياتنا الجميله ما يلي: لما سألها عزت أبو عوف أقتراحها ايه في وزراة الصحه قالت عربيات الأسعاف علي الطرق السريعه لازم تبقي موجوده وياريت لو يبقي في خط سير لعربية الأسعاف لها لوحدها عشان تقدر توصل بسرعه بدل المهزله اللي بنشوفها والناس اللي بتموت علي الطرق السريعه وكمان تطوير المستشفيات اللي حتي مش بيبقي فيها قطن .... في شوارعنا تفضل العربيه بتاعة الأسعاف بيب بيب وإحنا طرش ما بنسمعش لا وإيه الطريق يبتفتحلها وإحنا بناخدها فرصه ونجري بعربيتنا وراها ونزحم الدنيا برضوا, مش عاملين حساب أن اللي جوه ده ممكن يكون في يوم واحد مننا

---------------


الحلقه التانيه بقي صدمتني في البدايه من تقديم عزت أبو عوف للضيف... هو كان بيقدم مطرب ومن كلامه عنه أنا قولت الله ده بيتكلم عن مطرب أكيد مش موجود في مصر أصل المواصفات كانت جامده حبيتن وحسيت أن أبو عوف غلب هاله سرحان في الحته دي المهم قال عنه : إن كلامه أقوي بكتير من أي خطب ومن أي كلام ومن أي مقالات ولما عرفت الأسم أتصدمت

" شعبان عبد الرحيم "

بالنسبه له أهم وزاره هايمسكها لأبنه بس ياتري عصام ولا مين ؟؟ وهاتكون وزارة النقل والمواصلات , وده عشان يوقفله الطريق ويعديه ونعم الوزرا, وزير التموين في عهد شعبولا هو برضوا شعبولا يعني رئيس وزرا ووزير يا سيدي أنشاله ما حد حوش ووزير الضحك ودي وزاره جديده يا مواطن هو : سمير غانم واللي يدهشك بقي ان في وزاره جديده يا مؤمن للبوس أه والله طبعا الشباب هايموتوا من الفرحه أفرحوا بقي عندكوا وزير للبوس لا وإيه هاتبقي البوسه لها قانون هأو وهايبقي كمان في وزاره للكلام ووزيرها هو : طلعت زكريا وعلي حسب رأي شعبان ده لأ نه كلامانجي الله ينور يا حاج ده إحنا هانرغي للصبح , وفي بقي لكل غلبان وزاره أكيد هابقي عضوه فعاله فيها وبرضوا اللي هايمسكها شعبولا الراجل بجد ولا الغساله أم روحين يعني يقطع نفسه يا جدعان ياربي مليتوا البلد مليتوا البلد


شعبان عبد الرحيم رئيس الوزرا بيلبس 4 ساعات في أيده واحده ما شيه والتانيه واقفه والتالته والرابعه غتاته مش أكتر ....لالا ومش كده وبس وعشان تتفشخر بقي أكتر و أكتر هو بيغني في كل سجون مصر ربنا ما يحكم علي حد يارب وده لأن نص اللي في السجون أصحابه وأخيرا وقبل ما يتقلش من الوزاره لما سأله أبو عوف عن أخر قرار هايخده قبل ما يستقيل قال أنه :

هايقول لكل وزير خد بالك من نفسك وقول يارب....أقول قولي هذا واستغفر الله لي ولكم


تابعوا معانا كل يوم الحلقات

دي وزاره ماتمت




إمضاء:



نــــــاهد سمير

Tuesday, August 26, 2008

_- الحاضر الغايب -_



الحاضر الغايب

**


قولت زمان أنا ملك أديك

عايش دايب بين شفاتيك

قلب اتمني يوصل لك

ياما الناس حكولي عليك

رديت وقولت أنا منك وبيك

ميلت عليك كلمت عنيك

ردوا وقالوا :

روحي وقلبي بين كفيك

**

بعد ما قولت وكمان حكيت

لقيتني ساكنه بين ضلعيك

قلبي بينبض عايش بيك

فجأه ناديت وبعيني بكيت

محتاجك جمبي عايز الاقيك

في عز الشده سابني وراح

وقال يا فكــــــــــــــــيك

**

رجع من تاني وقال واحشاني

عيونك قمري وقلبك كاسي

أشرب منه وعمري ما أدوخ

ده أنا يومي ما يسوي من غيرك فيه

من تاني ناديت

بناجي عنيك

بحق الحب

إياك تكسرني

وعنيك تقهرني

ده أنا عشقي مايسوي

شوقي إليك

**

كسرني وباع

وفجأه أهو ضاع

كل اللي اديته راح وفي ثانيه

إيه يعني جراح ؟؟

وسمعته بيهمس

أنا خاين لك

وياعيني عليك

طيبتك في الدنيا

إهانه لك

قولت بحسره

انا عايش ليــــــــه ؟؟

بحب وبس

قال يعني بحس !!

طب هس وبس

**

أفتحوا شبابيك

للحب وشوفوا

هايحصل إيه ؟

هاتلاقوا تلاكيك

وتقول يا فكيك

ده أنا خاين لك

أصلي مأصل

فستان متفصل

وياعيني عليك

الحاضر الغايب

وسط الناس

بيبصوا عليك

وبعينهم يبكوا

من تاني ويشكوا

ويقولوا بحسره :

أه يا عيني عليك

**

وبعد ده كله

قولت زمان أنا ملك إيديك

دلوقتي بقول :

مش عايش لك

أنا عايش ليا ولحلم عنيك

شوفته زمان وأنا بين ضلعيك

وبقيت من بعدك

الغايب الحاضر

والفضل إليك

إسمحلي أقوم

وأقول يا فكــــــــــــيك






إمضاء :


ناهد سمير










Friday, August 22, 2008

.........نظرة لبعيد


تثبت لنا الأيام كل يوم أن ما زرعناه منذ زمن بعيد نحصده اليوم , وتثبت لنا أيضا أن أقرب الناس لنا زرعوا في الماضي ما نجنيه نحن اليوم شئنا أم أبينا .....

وفي كل الأحوال يا عزيزي عليك أن ترضي ليس بخضوع أونكسار ولكنك في كل الأحوال سترضي أب وأم كانوا عاشقين ...وصار الوضع بينهم فيما بعد أشبه ما يكون للصراع وأصبح كلا منهم يشير للأخر بأصابع الأتهام ..ونحن من يجني لاتعرف من الجاني ومن المجني عليه ؟؟ , أو لنكن صرحاء تعرف ولكن لا تستطيع أن تفصح عن شئ , بداخلك الأمنيات والأحلام ولكن دموع قلبك تنزل بأنين وشجن فها هي الاحلام تحارب للخروج للحريه لتستنشق عطرها ولكن ما الفائده


تقف كالطفل في المهد ينظر لهم نظرة حائره وبعد تنهيده تخرج من القلب لا تصل للقلب تقول : " تمنيت العيش وسط أسرة دافئه ارتمي في أحضانها واصبحت الأن وسط بحور من الرمال المتحركه لا أجد من ينقذني "ليس هذا فحسب بل جاء إليك من تسبب في جرحك ليقل لك كلمه واحده " إسمعني " أرغب في ان تكون إلي جواري بالفعل بالفعل أشتاق إليك ...أااااااااااه ثم أاااااااه تدمع عيناك من جديد بعد أن أشتاقت جفونك لدموعك منذ أمد بعيد الكل يطلب منك ان تسمعهم ولكن ........السؤال الذي يطرح نفسه بقوه من يسمعك انت ؟؟؟؟


بداخلك بحور من الكلام وكل ماتتمناه هو حضن دافئ ترتمي بداخله ويدان تلتف من حولك تشعرك بالأمان وعيون تهمس لك وتنظر إليك تتفهمك في صمت ولمسة يد حنونه تشعر معها أن الكون بين يديك أاااااااااه متي ستجد ضالتك يا عزيزي أهذا بمستحيل !!!؟؟تفضل الصمت كالعاده فما فائدة الكلام ...كلما تحدثت صاروا أبعد ما يكونوا عنك حتي صرت كالنجمه الوحيده في سماء ملبدة بالغيوم تهمس لمن حولها لعل هناك من يسمعها ولكن لا يوجد أحد وتظل تهمس وتهمس لعل يراها احد , توهم الناس بأنك السعيد الضاحك وترسم علي وجهك إبتسامه عريضه وعندما تبكي تري علامات استفهام كثيره ....وتسمعهم يقولون لك :اهذا انت من كانت ضحكته منذ لحظه تملئ الدنيا وما فيها تبكي وبغزاره عجبا لك !!


أااااه وأااااه من إحساس بداخلك انت تعلمه ولكنك تعجز عن التعبير عنه حتي أنه تاه في ثناياك فصار جزءا منك

أااااااااااااااه إذا صار أقرب الناس إليك هم أبعد الناس عنك
إمضاء:
ناهد سمير

Tuesday, August 19, 2008

كــــــــــــــــــان هنا



نعم أخذت القرار.....نعم رضيت بالفرار

ولكن مكانه لازال بداخلي مرت السنين وزاد عمري عام بعد عام ولكنه مازال بداخلي , وها هو يكبر بعيدا عني تلمسه غيري تحتضنه وتري نظرة عيناه ابتسامته ودموعه ..حيرته التي كنت المسها في صوته الان هي من تملك كل شئ أما انا لا أملك شئ ها هي تجلس بجواره تشعر بحرارة جسده التي تنبض عن حب يملئ الكون كما تعودت منه دائما ولكن لن تشعر هي به كما شعرت أنا ....


لقد ولد علي يداي عرف معني العشق معي كان كالطفل الذي تدمع عيناه كلما ذكرنا كلمه الوداع كنت معه اعيش في الجنه أستنشق عبيرها وأأكل من رطب نخيلها أسمعه ولا أسمع من سواه ..ولكن ها أنا ذا أحببت ومن أحبه ذهب لغيري تقترب منه وأنا أبعد أتألم وهي معه فماذا بيدي ؟؟


افترقنا وذهب بعيدا عني ولكنه بداخلي تربع علي عرش قلبي ومازال أميري الذي أهواه أقول لنفسي كثيرا إنني لا اتذكره ولكن فجأه اكتشف أنني انسي نفسي ولا أنساه حب يمتلكني وانا استسلم له فهو من علمني كيف أعشق وأهوي وأذوب ...هو الأول ولازال هو من يسكن قلبي بلا منازع


أحبه ولا انكر اهواه وأذوب في هواه كلما نظرت لبعيد أراه اسمع صوته حين كان يناديني حين كان يهمس لي بكلمه مازلت اتمناها منه " أحبك " ولكن الشمس غابت ولن تعود مهلا يا عزيزي فهذه ليست شمس النهار فهي علي وعدها لنا مرارا وتكرارا تشرق كل يوم ولكن غابت شمس حبي له وإن صدقنا القول فقد غابت شمس حبه لي


فقد كان هنا ......وأصبح هنــــــــــــــــــــــــاك




أمضاء :


ناهد سمير

Sunday, August 3, 2008

هي دي مصر اللي أنا معرفهاش


مرغم عليك يا صبح مغصوب يا ليل

لا دخلتها برجليا ولا كانلي ميل

شايلني شيل دخلت أنا في الحياه

وبكره ح أخرج منها شايلني شيل

عجبي !!


بصيت عليها من فوق لقتها جميله عجيبه , ومش بس كده غريبه بسيطه معقده, فاضيه بس مليانه كرهوها ولهم حق وفي الأخر حبوها ولهم الف حق ......

كبرت شويه ما أنا مش هافضل طول عمري صغير يــــــــاه رغم إن اسمي " الصغير " المهم بصيت عليها من تاني معرفتهاش ..وهاتسأل ليه ؟؟


هاقولك روح يا شاطر والعب بعيد ده أنت شكلك بليد , سيرك كبير مليان بني أدمين تجري وتلعب تنبش تنهب , ومن جواه سيرك صغير قليل اللي يعرف صاحبه مين ؟؟..بس اللي يغيظك إن هنا وهناك محدش عارف مين بيلعب إيه وعلي مين ؟؟؟


كلها ما سكات بنتداري جواها منها الملون ومنها الساده , بنبص علي بعضنا من ورا ستاره زي الحراميه وبنبرر الغلط ونقول عليه أكبر صح عالم تخونك بقانون موحد " أن الحرام أكبر حلال وبدون جدال " ..تلعب شقلبظات في الهوا وكأنك ريشه ترسم بخطوطها أجمل قوس قزح كل العيون ملهوفه عليك خايفه تقع تتكسر , وأنت خايف تطلع لفوق في الهوا وتتشعلق في حلمك وفجأه الحلم نفسه يكسرك ....


فجاه أقرب مالك يطعنك ..طب وإيه الجديد ؟؟ ويوم ما تعيد الشريط من تاني تكتشف إنك أول المجانين تسأل نفسك السؤال الملغي من قاموس البني أدمين ليه وعشان ايه ؟؟, وترد علي نفسك من تاني ...دي عالم مفيش في قلوبها رحمه عالم حاقده وجاحده لا تعرف تغفر ولا تسامح تقتل وبس وأسهل حاجه عندها الأنتقام ..


وتبدأ تتفرج علي فقرات السيرك واحده ورا التانيه ..وفي كل مره تسقف وتصفر كمان لغاية ما دخل الراجل الهمام صاحب الموهبه راكب الفرس وشادد اللجام .." البلياتشو " صاحب الوش الملون مبتسم علي طول رغم إن عيونه غرقانه دموع يضحك كل اللي حواليه وهو محتاج اللي يخفف عنه هموم الكون بحاله عمرك شوفت أغرب من كده إن اللي بيرسم البسمه علي شفايفك محتاج يتعمل إزاي يضحك...يضحك صحيح لكن يوم ما تقسي عليه بيبقي في شدته وقسوته اقوي أشرس من الوحوش ..في أزمته ساب الكون بحاله وساب حضن البني أدمين وراح لحضن الوحوش بصلهم وابتسم وكأنه بيلاعب طفل رضيع ...خاف منه ده من خاف ساعات سلم...


ويعمل إيه يوم ما يلاقي نفسه متهم بتهمه معملهاش يقول مظلوم يردوا ويوقولوا : عيب يا راجل خليك شجاع خلصنا وإعترف ....ويشتد اللوم ويردوا عليه وعيونه باصه للأرض تشكي وتحكي عن حاجات كتير جواه : ليه يا صغير سبت السيرك الصغير اللي تفهم فيه اللي كنت بتطير وتضرب شقلبظات جواه وتدخل سيرك اكبر منك وصعب عليك لا تفهم فيه ولا يساعك يا صغير ده صعب عليك واديك شايف طب شيل بقي بلاويك , وهو مصر الحق معاه صاحب موقف مش بس كده ده قالها كمان " أنا فاهم " وصاحب السيرك هو اللي مش فاهم ......


هي دي مصـــــــــــــــــــــر اللي ناسها عارفين ..أو يمكن حاسين ياعم مش احنا بس اللي عارفين الحقيقه ...هي دي مصـــــــــــــر اللي فيها سور فاصل بين العايشين والميتين .......

هي دي مصـــــــــــــــــــــر اللي انا معرفهاش





أمضاء :



ناهد سمير

Saturday, August 2, 2008

اعدام ميت


أيا كان شكل الضياع ...حرقا غرقا أو بين أسنان القرش وغيره من وحوش البحار التي لا يعلمها إلا الله فهو في النهايه ضياع لأرواح لا ذنب لها سوي أن في بطاقتها جنسية مصري ...زاد النحيب وارتدت مصر الحبيبه ثوب الحداد يومها حزنا علي أولادها وها هو صوت البكاء والنحيب يعلو من جديد علي " إعدام الميت " فبدلا من أن نعطي له حقه لا بل نطعنه من جديد ونهدر حقه لنعطيه لمن لا يستحق .


أهذا ما يستحقه أولادك منك يا بلادي ...نعزف كلنا بأسمك علي أوتار قلوبنا والأن عندما نطلب الحق والعدل ليكون شعار أمه وشعب تعيش علي أرضك تقلب الأمور لصالح الظالمين ونصبح نحن المشكله ونحن من لم نعلم أبناءنا العوم لذلك غرقوا في بلادهم من يعقل ذلك من يقبل من يفهم ؟؟


مات 1033 فرد من ابناءك ...سافروا وعندما قرروا العوده ليرتموا في أحضانك أغرقتهم عباره يقال عنها السلام , ولكنها اسم بلا فعل ...بل هي الخوف بعينه والدمار بكل ما تحمل الكلمه من معني , ضاعوا بين الأمواج بلا مغيث ظنوا أنك ستأخذين بثأرهم ولكن ...ضاعوا وأصبحوا أموات وضاع الحق معهم من يرضي بذلك ..أقسم إنني أبكي وانا اكتب يا بلادي ....مصر إني احبك ولكن اشعر أنه لم يعد لي مكانا بداخلك كل ماتمنيته يهدمه أناس بداخلك ....أخشي ان يجعلوني أفقد حتي القدره علي التمني وأن يسرقوا حتي الحلم من داخلي ...كنت ادعوا غيري للحلم وعشق ترابك يا بلادي ولكن الأن انا عاجزه عن أن امنح الأمل حتي لذاتي ...فالصمت والغضب والكتمان أصبح يسود الموقف بلادي أنتي امي وعشقي ومنتهاي ولكن الحلم يسرق مني ما يحدث فوق طاقتي فمن يرحم الأم والولد والزوجه ؟؟؟


العباره السلام ممدوح إسماعيل وابنه ومحاميه يا من تتشدقون بالدفاع عن من تطلقون عليهم مظاليم أقول لكم انكم قتلتموهم وتقتلون بداخلنا نحن المصريين العاشقون لتراب هذه البلاد حبها وعشقها يالله يا مغيث ..اسمعني أنت من ذكر هذه البلاد في قرأنك وانت لا ترضي أن يظل الظالم حر طليق ويجبر المظلوم علي ان يظل طير سجين بين جدران السجون !!


يابـــــــــــــــــــــــــلادي إن كانت هذه هي الحريه ....فلتسقط الحريه , ولتحيا الديكتاتوريه وليحيا معتقل حبك يا مصــــــــــــــــــــــــــــــــــــــر




أمضاء :



ناهد سمير

عفوا إنني مصري.......






إن سرت يمينا ستراها يسارا ستراها أمامك خلفك , وجوارك .. الضريبه من تكون ؟ ؟ هل هي الوحش الكاسر الذي تتزايد شراسته يوما بعد يوم حتي صرنا لا نستطيع مقاومته والأعتراض عليه ؟....أم انها الحق الذي تطالبنا به الحكومه من أجل تحقيق مصر أفضل ؟ نفكر دوما في هذا السؤال ولا نجد كمواطنين نعيش علي أرض الواقع سوي إجابه واحده ...أن الحكومه تثقل علينا وتلقي علي أكتافنا الكثير والكثير من الضرائب بمختلف اشكالها ولكنها في النهايه ضريبه تأخذ من أموالنا ولا نعرف إلي أين تذهب وفيما تنفق وهل هذا تحقيق لمبدأ التكافل الأجتماعي بالفعل أم زياده للفجوه بين الطبقات الأجتماعيه في مصر وبدلا من أن نعيد الطبقه المتوسطه للهرم الأجتماعي فنحن نقضي علي صديقتها القريبه منها وهي الطبقه الدنيا , ذلك لتصبح الطبقه العليا منفرده بالهرم أسوة بأجدادنا الفراعنه ... في الأنفراد بالحكم والظهور وما غير ذلك من الأنفرادات فنحن الفراعنه الصغــــــــــــار






جلست أقرأ قول أشرف العربي رئيس مصلحة الضرائب " مصلحتك اولا " ...فعندما شرح الواقع قال : إن الأيرادات التي تم تحقيقها هي 116 مليار جنيه , وأن المتأخرات 60 مليار وهناك خطه تم وضعها لتحصيلها وكل ذلك شئ عظيم ولكن ماهي الفائده التي عادت عليك انت كمواطن مصري وعلي معدومي الدخل ؟ ...وعندما سئل عن قانون ضريبه القيمه الجديد جاوب متواضعا وكأنه يلقي في داخلك السخط والغضب لتثور وتنفجر وهو يجلس ويتحدث بكل هدؤ قال: انه سيتم تأجيل مناقشه هذا القانون في مجلس الشعب وذلك مشكورا لأنه يعلم أن المواطن المصري معدوم الدخل ..له الحق في أن يلتقط أنفاسه من كل هذه الضرائب , ولكنه لم ينكر عزيزي المواطن أن الضريبه الجديده في الطريق إليك لتنضم لأخواتها ... “ الضريبه العقاريه _ وضريبه الدمغه _وضريبه الدخل وغير ذلك ...” من الضرائب التي يتوجب عليك دفعها شئت أم أبيت...






في الزمن القادم سيكون هناك ضريبه للسير ودخول دورات المياه وان كانت هذه موجوده بالفعل وضريبه علي ان تنجب وغيرها مما يثير بداخلك الغضب والشجن وكأن الشعار هو : تملك المال ستعيش لا تملك فأترك الحياه لمن يملك ثمنها حتي قانون المرور الجديد وما به من غرامات كثيره تسقط وكأنها سيل جارف يأخذك لبعيد دون سابق إنذار , المهم أنك ستدفع للحكومه من حر مالك وأنت لا تعرف ما الهدف من كل هذه الأموال التي تأخذها الحكومه بأسم الضريبه الي متي سيظل الوضع بهدذا الشكل ما نأخذه باليمين ننفق اضعافه باليسار ٫٫الي متي سنظل نصرخ ولا يسمعنا احد ؟.. الي متي سيظل ضجيج الصمت بداخلنا يقتلنا ؟ .. وهل سيأتي علينا الوقت لنري فيه المواطن المصري يدفع ضريبه هوائيه علي ما يستنشقه من هواء بلاده ؟؟






!!عفوا إنني مصري









إمضاء :






ناهد سمير