في أسباب كتير تخليني أنزل ميدان التحرير يوم الجمعة 9/9/2011 أن شاء الله يعني علي سبيل المثال :
------------------------------------------------------------------------------------------------------------------
* أنا نازله عشان رمضان للأسف كان بطعم الفلول , والقنوات الخاصة ماشاء الله أغلبها كان عشان يطلع للنور أخد الأذن من النظام الفاسد اللي خلعناه يعني هما جزء من المنظومة الفاسدة , ومش بس كده دول في رمضان عملوا اللي عليهم وزيادة شوية في ترتيب وتنظيم ظهور الفلول وكل من أهان الثورة , واللي لسه بيدافعوا عن المخلوع ومفيش حد فيهم ع الأقل أعتذر , وكأن الثورة ما قامتش !!
* نازله لأن مناصب مهمة في الدولة زي الوزارات والمحافظات وغيرها لسه بيتعين فيها أبناء مبارك !!
نازله لأن التعليم محتاج يتطهر والطلبة من حقهم يختاروا أساتذة الجامعة ورؤساءها بدل اللي عينهم أمن الدولة .
*نازله لأن كتير من القضاه والمحامين بيأكدوا أن الأدلة اللي قدام القضاه اللي بيحاكموا مبارك غير كافية وسهل جداً المحامين بتوعه يطلعوه براءة بسهولة بسبب عدم كفاية الأدلة وعدم جودة التحقيقات !
*نازله لأن الداخلية لسه بتستعين في شغلها بالطجية والمسلحين خطر , والسرقة اللي في عز الضهر تشهد وحوادث القتل الفظيعة في الجرايد تشهد , ده غير البياعين الجائلين اللي منتشرين جداً وبيغيروا ملامح شوارعنا , بس بصراحة الداخلية مشكورة بتنزل من وقت للتاني عساكر مرور بتنظم المرور أحياناً .
* نازله عشان أقول إن في فرق بين العفو والتسامح وبين العبط والهبل والسماح لغيري إنه ياخد حقي اللي عشان أنوله دفعت دم :)
* نازله عشان رموز كتير من رموز الفساد في النظام المخلوع نازلين إنتخابات مجلس الشعب وكأننا معملناش ثورة وفاكرين ان الذاكرة إتمحت ومش عارفينهم ولا عارفين وشوشهم الكدابة .
* نازله عشان كرهت الفُرقة اللي إحنا فيها وعشان الأحزاب والقوي السياسية لغاية النهارده ماشوفنلهاش برنامج أو رؤية محدده , الكل بيلعب بأوجاع الناس وبس وبيرفعوا شعارات براقة كرهناها ده غير انها مابتتحقش كمان , وكمان بيحاربوا بعض بينا وبيقسمونا علي بعض وكأننا ورث !!
* نازله عشان أعرف مين هو الشعب اللي يريد اللي كل رواد البرامج بيتكلموا عنه
نازله عشان عصام شرف تايه ومش لاقينه يا جدعااااااااااااااااااااان :(
* نازله عشان مستقبلي أنا وغيري إحنا اللي نرسمه مش غيرنا يمشينا علي هواه
* نازله عشان دم الشهيد .
* نازله عشان أجيب حقي اللي هو أصلاً من حقي .
* نازله عشان أكبر حملة شحاته شوفتها في رمضان محتاجة أقولها ( طظ ) , نازله لأن الحكومة اللي مَرضتنا وفَقرتنا سنين طويلة بتعايرنا بمرضنا , وبتلعب بأوجاع أطفالنا قدام الكاميرا وبتاخد مننا قال إيه اللي عايزه تداوينا به !!
* نازله عشان نفسي أهل الدين يهتموا بالشأن العام الليو لا ينفصل عن الدين بالعكس ده هو جوهره و نفسي اسمع أهل الدين يقولوا كلمة حق في وجه سلطان جائر , نازله عشان نفسي أسمع خطبة جمعة تعبر عن حالي أنا وغيري , نازله عشان نفسي اسمع الإمام اللي واقف ع المنبر بيدعي لبلدنا مش لزعيم فالسو , نازله لأني نفسي الاقي اهل الدين بيتعففوا عن إهانة غيرهم والدعاء عليه لمجرد إنه خالهم !!
* نازله عشان أكوام الزباله اللي ماليه الشارع تقل بقي :( بمعني أصح كده ننشط المحليات اللي نامت يفي الخط
* نازله لأني عايزه اعيش في دولة مدنية تكفل الحرية لكل المواطنين في ممارسة السياسة والفكر والعقيدة , نازله عشان أجورنا لازم تناسب متطلبات حياتنا , نازله عشان وظيفة مناسبة ومحترمة ليا ولغيري نخدم بها الدولة .. نازله عشان بحلم ببلد ديموقراطي بمعني " بلد أقل فساداً " يعني مش المدينة الفاضلة زي ما بيروج البعض 1 لكن بحلم بمدينة ترفع من شأن الإنسان عشان هي نفسها ترتقي من خلاله .
* نازله عشان سيادة القانون وإستقلال القضاء
*نازله عشان بدأوا يصدرولنا اليأس والضعف من تاني ويقولولنا أن ليبيا وثوارها أحسن مننا لأنهم كملوا المشوار وماوقفوش إلا لما جابوا حريتهم بأيدهم ومساعدة الناتو طبعاً , لكن هما بينسوا أن ليبيا الشقيقة اسقطت نظام فردي " نظام القذافي " اللي استعان في قتل شعبه بمرتزقة أفارقه أما مصر فالفساد فيها من أول الراس لغاية صوابع الرجلين الفساد فيها مؤسسي موجود في كل بيت وفي كل دايرة وكل شركة موجود في العشوائيات وفي كل نقطة تراب في شوارعنا
الثورة المصرية " ثورة الورد البلدي " فتحت باب التطهير لنظام فاسد بقاله سنين والطريق لسه طويل ومكملين
نازله لأن نظام بلدنا مختلف عن نظام أي دولة تانية لكن الثورات كلها واحده وهدفها واحد إسقاط النظم المستبدة
عشان كده نازله أقول لليأس لاء أنا مكمله
نازله أقول للضعف لاء أنا مكمله
نازله أقول لبقايا الفساد غصب عنكم مكمله وحتي لو المشوار طويل بلدنا تستحق
* نازله عشان الأساتذه اللي بيعايرونا بتركيا واعتقد هما معروفين جداً , محتاجه أقولهم سبحان الله عمالين تعيرونا بنظام ودولة سبقونا بسنين كتير وإحنا لسه بنبتدي المشوار أصلاً , طب اتكسفوا علي دمكم وانتوا بتطلبوا من ثوار كل اللي حيلتهم التنظيم والفكر ونور ينوره به الطريق لنفسهم ولغيرهم ولجيل جاي إنهم يحصلوا تركيا في السباق
نفسي اقولهم صدعتونا بعجلة الإنتاج ولو عايزينها تمشي بجد خليكوا علي جنب شوية وادوهالنا ندورها وحاتشوفوا حانعمل ايه ؟
ولو حانعاير بقي بجد يبقي لازم برنامج بني آدم شو من تركيا لازم يتذاع حصرياً لمبارك في سجنه عشان يعرف ان آل مصطفي أتاتورك سبقونا بمراحل .
