أعتقد يعني من واقع التعامل مع ناس كتييييير علي الرغم من صغر سني وبرضوا لما بقعد اتفرج ع التليفزيون واسمع الراديو او اقرا الجرايد ..أكتشفت وده طبعا شئ ناس كتير اكتشفوه قبلي :أن الشعب المصري كله بمختلف طوائفه الكبير والصغير ابن الباشا وابن الغفير الريس والشعب اللي بره واللي جوه ....كله مريض بأنفصام الشخصيه ..أيه مش مصدق ده أنا نفسي مريضه بأنفصام الشخصيه عايز الأدله طب خد عندك يامعلم ........
أولا:في مسأله المطالبه بالديموقراطيه في بلدنا وحقنا في ممارسه الحريه اللي بيكفلها لنا الدستور ده اذا كان في دستور اصلا أنما ازاي ده بالنسبه للحكومه وجع دماغ وهي مش ناقصه طب تعمل ايه تمشيها انفصام طبعا ..تقولك ايه انا هادي كل واحد حقه يقول اللي هو عايزه ويكتب اللي هو عايزه وفعلا تسيب كل واحد يعمل اللي هو عايزه وفجأه تلاقي امن الدوله قابض عليك انت واهلك كمان بتهمة اهانه الريس والتخطيط لقلب نظام الحكم اللي هو مقلوب اصلا وبكده بقي الحكومه تبقي عملت اللي عليها ولعبت الدور صح ..منها سبتك تعمل اللي انت عايزه وبرضوا قبضت عليك علشان تحافظ علي الأمن القومي للبلد مش بقولك أنفصام.
ثانيا: وده البوب الكبير بقي الريس يقولك ايه هما فترتين وبس مش هاجدد والكلام ده يامعلم سنه 81 اما بقي الكلام سنه 2006 ساظل طالما في القلب نبض أظن مفيش اكتر من كده انفصام ...وكمان ايه يبقي الراجل رجله والقبر ويقولك العبور للمستقبل وثمار ما حققناه ثمار ايه بس وبلح ايه وعنب ايه بس؟0
ثالثا :الأفلام والممثلين ..او الفن عامه ..انا عن نفسي اعتقد ان فيلم او مسلسل او مسرحيه او اغنيه ممكن توصل فكره في لحظه اسرع من حوار ممكن يستمر لأيام وبرضوا الفكره ماتثبتشانما بقي خد عندك فيلم زي قصة الحي الشعبي لسعد الصغير ونيكول سابا وطلعت زكريا كانوا بيقولوا ان في خلاف بين نيكول سابا وطلعت زكريا علي أفيه معين ممكن يتفهم غلط عند الناس هههههههه اذا كان الفيلم كله عباره عن أفبهات غلط في غلط واللي مش مصدق يشوف التريلر بتاع الفيلم وبعدين الفيلم من انتاج السوبكيه يعني وسع للجزارين يامعلم ! ولا اللي تعمل فيديو كليب بتعرض فيه جسمها للبيع وتقول الفاظ خارجه وتسألها تقولك ده توفيق من عند ربنا توفيق أيه يا ام توفيق وتقولك أصله مسمع مع الناس وهما اصلا بيشتموها في الشارع .....ولا المسلسلات ندخل بقي علي البوب الكبيير ياخويا كل ممثل طالع الأنسان البئ اللي مابيغلطش المجني عليه دايما واللي دايما بيسامح امال فين الجاني فين الناس اللي بنشوفهم في الشوارع وبيطلعوا عينا في المصالح الحكوميه فين الأنسان الطبيعي ولا أحنا بنخاف من الحقيقه لما بنلقيها متمثله قدامنا 0
وبنقول عليها ده هدم للمجتمع ده اسفاف ده تشويه لصورة مصر والصوره مشوهه اصلا ..حتي حمله الدعايه لمصر سنه 2006 كانت عباره عن حمله دعاره متنقله يسرا وفستان صدره مفتوح واميره فتحي بالميوه ودينا الرقاصه وكان مصر مفيهاش غير نسوان وبس علشان العرب والسياح يتفرجوا عليهم خلاص نسينا الهرم والبرج والقلعه والمعابد والفراعنه والحضاره ياخساره وبعد كده يامعلم لازم يقولوا ده توفيق من عند ربنا ههههههههههههههه0
رابعا: عارفه طولت عليك بس معلش استحملني انا اصلي مخنوقه ومرارتي مفقوعه..زي ما انت عارف كلنا مخنوقين ومبنعرفش ننفس بكلمتين عن الحكومه والنظام اللي ماشي في البلد ده اذا كان في نظام اصلا لان بلدنا لامؤخذه ماشيه بالكوسه ..فتلاقي كله بينفس علي كله علي اللي اقل منه او اللي اصغر منه في السن يعني تلاقي المدير مطلع عين الموظفين ومبهدلهم وبعد كده يطالب بالديموقراطيه وحريه الرأي وهو اصلا اكبر ديكتاتور والمصري او الموظف المصري اللي بيعشق الروتين مطلع عين الشعب ومطفحه الكوته وبعد كده يطالب بالديموقراطيه والعدل وكل اب وكل ام بيطالبوا بالديموقراطيه هما اكبر ديكتاتوريين في بيوتهم لا أراء بعد رأيهم هما الصح دائما ولا مجال لاي مناقشه او سماع اي رأي وساعتها بقي الرد هو " مبقاش غيرك اللي هايعلمنا الصح من الغلط انت تسمع وبس"0وبعد كده يطالبوا بالديموقراطيه انفصام ده ولا لاء؟0
خامسا:أنا وانت لالالا دي مش تحيه في فرح ....طب سمعني سلام وحته للعريس والعروسه وسمعني سلام صعبت عليا نفسي........ انا وانت مرضي بأنفصام الشخصيه تلاقي الواحد مننا عامل فيها ارسطو وحكيم عصره وأوانه وهو لامؤخذه بهيم ولا عارف حاجه وكل واحد فينا يسمع رأي مخالف ليه تقوم الدنيا وتقعدش وبعد كده بنطالب بالديموقراطيه وحريه الرأي ونطالب غيرنا انهم يوسعوا صدرهم وعقولهم لأراء الأخرين بس ياخساره بننسي نطلب ده من نفسنا شوفت بقي انك عندك انفصام صدقني الشعب المصري 99.9% منه مرضي بأنفصام الشخصيه0
سادسا واخيرا: تلاقي الشاب من دول خانق اخته وقرفها في عشيتها وهو يطلع من البيت من هنا وكأنه في امريكا يعاكس ويغازل ويشرب كل اللي في مزاجه والأسم ده ولد وراجل يعمل اللي هو عايزه ...معاك أنه راجل وصلاحياته غير البنت بس ده مش معناه انهة يغلط ويبرر لنفسه الغلط وكمان يقول انا مغلطتش ...والشاب من دول يقعد ع القهوة ويتفرج علي كل مايثيره ويروح البيت يقول لاهل بيته لو بيتفرجوا علي اغنيه لنجلا ولا روبي ولا بوسي سمير أقفلوا اصل دول كذا وكذا ...وبعدين ده عيب ..الله طب ما انت بتتفرج عليهم ع القهوه كل يوم ..انفصام ده ولا مش انفصام يامعلم؟
هاصدقت انك مريض طب يلا بقي روح اتعالج واذا لقيت دكتور كويس بس اوعي يكون الدكتور كمان عيان ...أبقي احجزلي معاك يامعلم
.قشطاااااااااااااااااااااااااااااااااااااااااااااااااااااااااااااااااااااااااااااااات أشوفك أمس0
