إحنا اللي بنموت عشان سيادتك تعيش :(

بيسألونا طول الوقت في التليفزيونات إنتوا مين؟ وعددكم كام ؟ وعايزين إيه ؟ وتبع مين ؟ ..

بيسألونا ويسألونا بقالهم سنة ونص , وكل مرة بنحاول نجاوب برضه نفس الإجابة , وكل مرة مُطالبين ندافع عن نفسنا وعن حلمنا ودمنا اللي سال في الميادين ونقول :

إحـــــــــــنا ثورة , إحــــــــــنا بكرة , إحــــــــنا اللي مات وهو عايش , واثبت أنه عايش يوم ما مات !!

وادينا اهو بنقولها تــــــــاني في كل حتة للتليفزيون والجرايد والراديوهات إحـــــــــنا \

" اللي صدقنا الشاعر ميدو زهير لما قال : اسأليني يا حبيبتي ع اللي داير في البلاد اللي فيها صادروا حلمي وباعوا صوتي في المزاد , اسأليني اشمعني صابر ع المآسي المُلهية أقولك إني واحد م الغلابة الأغبياء اللي صبروا في إنتظار المعجزات والأنبيا , واللي فاق من وهمه فجأه لاقي كُفر قوم عاد , لسه برضه قلبه طاير كعب داير في البلاد .

إحــــــنا اللي صدقنا الشاعر رامي يحيي لما قال : حُر إني أعشق بلادي واللي حايفكر يعادي أتزرعله في حلقه مُر , وابقي حُر .

إحنا اللي صدقنا الشاعر ضياء الرحمن لما قال : مغمض وشايفك بتضحك عليا

\ الصبر مش دايماً جميل ولا كل تأخير بخير .. و

\ تراهني إنها بكرة حاتفرج ..و

\ إزاي يا نيل وأنت الوجود تمحيني من وش الوجود ؟.

إحـــــــنا يا عم اللي صدقنا بلاك تيما لما غنوا : حكومة عايزه ظبط .. و

\ فعل وفاعل مفعول به تعرب مجلس شعبك إيه ؟ مجلس طبعاً تبقي مضاف شعبك هو المُضاف إليه .. و

\ أنا حلمي عادي شكله عادي ومالوهش سبأه في أي ماضي هادينه ليه بس الآعادي ده لا عنده مال ولا له أراضي ومالوش مكان غير قلبي أنا !

إحـــــــنا اللي صدقنا زمان في المدارس تحية العلم , وحفظنا النشيد بالقلب قبل اللسان , وقولنا بفطرة الحب " بلادي بلادي لكي حبي وفؤادي "

إحــنا اللي صدقنا مفهوم الكرامة , وآمنا بصلاح جاهين , والشيخ إمام ..

إحنا اللي طيرنا طيارة حلمنا من فوق برج الحمام ..

إحنا اللي صدقنا المسيري وعبقريته , وصدقنا أن بكرة احلي بينا ..

إحنا اللي مش عارفين نشتغل عشان مالناش برتيته نتمسح فيها , ومعرفناش نتعلم صح فعلمنا نفسنا بنفسنا , وكمان مش عاجب !! .. إحنا اللي فرصتنا في الجواز والخلفة أقل عشان العمر بيتسرق ..

إحنا اللي مابنخافش الموت , ويوم ما بنقع مضروبين بالرصاص أو مخنوقين بالغاز ونسلم روحنا للديان حضراتكم بتتفرجوا علينا قدام الشاشات بكل جبن , وموت قلوب وتنَظروا وتحللوا وتقولوا " اه ده شهيد ولاء ده مش شهيد ده بلطجي ويستاهل القتل !! "

إحنا اللي آمنا بتراب البلد دي وسفِناه عشان مكنش لنا غيره زاد

إحنا اللي وهمونا برأسمالية المنتخب وحولونا لبلد النادي الواحد , وخدعونا بأن فوز المنتخب هو أكبر إنتصار للبلد , فحزموا سعد الصغير والحضري بالعلم ورقصوا علي جثث إخواتنا اللي غرقوا في عبارة قال إيه السلام !! ..

بالظبط زي ما كتير دلوقتي بينظروا وبيضحكوا ويرقصوا علي جثثنا ودمنا اللي سال ولسه بيسيل عشان شوية مصالح أومرتب , وإنفراد في برنامج !!

إحنا اللي موتنا في الميادين , وفي محمد محمود وماسبيروا , ومجلس الوزراء واتسحلنا واتحاكمنا ولسه بنتحاكم عسكريا , إحنا اللي طول الوقت مشتومين ومشكوك في وطنيتهم وفي دينهم وفي سمعتهم ,وأنكشف علينا عذرياً واتقتلنا غدر في بورسعيد.. ولغاية النهارده محدش حاسب اللي قتلنا رغم أننا شاورنا عليه وورناه للعالم كله صوت وصورة ..أقولكم \ إحنا اللي دهنا الهوا دوكو !!

إحنا ...إحنا يا سيدي اللي صدقنا الأبنودي لما قال : " من حق كل الناس إنهم يقفوا أو يكملوا , يمشوا أو يتكعبلوا , يتوهوا أو يوصلوا "

إحنا اللي صدقنا أدب نجيب محفوظ , وحكمة الغزالي ومحمد عبده ..

إحنا اللي بنموت عشان وطن يعيش ..

إحنا اللي بنطالب بالحرية والكرامة والمستقبل , وإنتوا أقصي أحلامكم أن النهارده يعدي بسلام, والإستقرار , وعجلة الإنتاج , ومراعاة مصالحكم اللي بتيجي علي جثثنا !!

إحنا اللي حانملك بكرة وكل من ضحي بالوطن وساهم باللعب في مستقبلنا وقتلنا بكلمة أو رأي أو رصاص وغاز حايورث الندم والعار ..

إحنا اللي بنقولكم الأتي : ساذج جداً وعبيط اللي يطمع في وطن , وأعبط منه اللي يصدق أن الدم حايروح هدر , واللي يفكر إننا حانيأس أو نمِل .

إحـــــــنا ...إحنا الثوار .. إحنا مصر .. إحنا الصغار أصحاب العقول الكبيرة , اللي الكبار شايفينهم عيال وللحق مش كل الكبار .. إحنا المُندسين الأحرار بكرة لنا , وشمسنا حاتدفي بلادنا وتنور طريقنا عن قريب J

الثورة مستمرة , ويسقط يسقط حكم العسكر.

ن.س