شعري منعكش

قولت أنا هاكل لقمة عيش

قالوا يا أبويا دي لحظة طيش

فتحت الشيش لجل في يوم يدوني بقشيش

نزلوا عليا يادوب تلطيش

وأهو كله مـــــــــــــــــــــــــفيش

وأنا برضوا بـــــــــــــــــــــــــعيش

كلام بالهمس , عنين بتبص

وأنت يا عيني.. فاكرها الشمس

وهي لاهيب النــــــــــــــــــــار وجحيم

ماشي غشيم, وأنت كفيف العين والقلب

واخـــــــــــــــــد جنب عايش ذنب

لاهو بتاعك ولا راسمالك

تمر أيام , وتمر سنين

يا ما بكره نشوف.. يا ما بكره نعيش

ده كــــــــــــــــــــــــــــلام تهويش

لأنك قولت : أنا هاكل يوم لقمة عيش

إلـــــــــحق يا شاويش

ده حـــــــــــاميها حراميها

قـــــــــــــالك ده ماليها

وهـــــــــــــــــو مفضيها

عــــــــــــــارف أراضيها

فـــــــــــــــاهم أهاليها

بالعين والحاجب أهو مقضيها

وفي لحظة طيش وأنا ع الكورنيش

فاهم ومطنش وقميصي مكرمش

محتاج لحرنكش لقلبي يفرفش

ده أنا شعري منعكش , وبرضوا هاعيش

رغم التلطيش, والكوسه والعيش

وأهو بكره تروح يازمن غلبان

فاكر يا زمان ..كنت زمان بتقول : يا عيال

مالكم قومه ولا فيكو رجال

وأدينا اهو ...عايشين في جمال

شايلين أحمال واخدينها شمال

يــــــــــــــــا زمن رحال

دي دنيا تغيظ

وأنا فيها بعيش وبقول : يا حفيظ

من شعب خبيث غرقان تدليس

وانـــــــــــــا فيها عريس

واقف في الزفه ..سرحال بخيالي

ونجومها تلالي ..عاشق ترحالي

وأنـــــــــــا برضوا عريس

شوفت وإيه يعني

ما في يوم يمنعني جبروت العبد

ده انا سيفي في يد صلاح الدين

واقف ومطنش , وقميصي مكرمش

وأهو شعري منعكش في ميدان عابدين

وفي وسط الزفه أهو كله يهيص

وأنا برضوا عريس

نــــــــاهد سمير