زحمه وسط البلد تخليك تاخدها كعابي من التحرير للزمالك000وبرضوا ماتوصلش

زحمة وسط البلد في البدايه كان لها شكل معين , وكنا خلاص اتعودنا عليه 00يعني مثلا ان الميكروباصات تبقي مليانه ع الاخر وبرضوا التباع يقولك فاضي يا استاذ اركب اركب 00وده واضح اوووي في ميدان التحرير اللي بقي رمز من رموز تلاحم الشعب بكل فئاته وطبقاته 00او الاتوبيسات اللي عمرها ما تقول لاي راكب لا وده مهما كانت مليانه علي اخرها ده حتي ال سي تي ايه المكيف بقي زحمه وطبعا المترو معروف انه في اوقات معينه من اليوم بيبقي عباره عن علبه سردين متحركه وريحتها معفنه وبرضوا خدنا علي كده 0

انما بقي الزحمه بقي لها شكل تاني خاااااااااالص , يعني مثلا الميكروبازات " زي ما الناس بتقول عليها " 00اللي رايحه التحرير بتقف ساعه علشان تعدي من علي كوبري ابو الفدا لكوبري ابو العلا شوفت التقدم لدرجه انك هاتحس انك راكب مرجيحه مش مكروباص وبعد كده لازم تشمر علشان احنا داخلين علي زحمه الكورنيش والتليفزيون والاشاره قول ربع او نص ساعه بس انت ممكن تسلي نفسك بمنظر الحبيبه اللي ع الكورنيش او ارغي مع اللي جنبك وخلاص 0

وبعد ما توصل للتحرير بالسلامه اللي هو اصلا مبقاش له ملامح من كتر الناس اللي واقفه فيه لو فكرت تتمشي مش هاتعرف الناس كتير والعربيات اكتر وقال ايه بيقولوا البلد مفيهاش فلوس يابشر ده وسط البلد بقي فيها جاجور وهامر وبلاوووووي سودا اسكتوا اسكتوا

ولو طلعت في دماغك فجأه وقررت تروح الزمالك 00وتحاول توقف تاكسي اللي هو المواصله اللي تقعد فيها وتقول لنفسك اهين قرشي ولا اهين نفسي بس للاسف ولا تاكسي راضي يقف لحضرتك اللي مايردش عليك اصلا واللي يقولك لالالا مش سكتي وطبعا انت مينفعش تركب تاكسي العاصمه لان ساعدتك من معدومي الدخل فجأه قررت انك تمشي من التحرير للزمالك كعابي واهي تمشيه وخلاص بس الزحمه ع الارض اكتر بكتييييييير من زحمه المواصلات الناس بقت زي السلاحف لدرجه ان المشوار اللي ممكن ياخد ربع ساعه بتوصله في ساعتين واكتر او ممكن برضوا ما توصلش 00وبعد ما وصلت بالسلامه لارض الزمالك قولت تعدي ع الساقيه وياريتك ما فكرت تعدي عليها الكوبري واقف والناس مش طايقه بعضها والتاكسيات مش عارفه الساقيه فين اصلا طب ايه هاترجع تاني كعابي 00للتحرير لالالالالالالالا كده كتير في الوقت ده اكيد انت فكرت في اقتراح قاله واحد صاحبك قبل كده والاقتراح بيقول احنا بعد كده هانركب طياره علشان نروح التحرير والسما بقي تبقي وسيله مواصلات وطرق وكده يعني بما اننا بنركب بري ومائي نبقي كمان بنركب سماوي طب بجد ليه الاقتراح ده مايتنفزشي 00الي كل المسئولين وكل من يهمه الامر انظروا في هذا الاقتراح 00بس علي كده بقي السما هاتبقي زحمه اوووووووي ولا ايه؟؟؟؟؟؟؟؟؟؟؟0000000

أمضاء :

أسطوره