أحد مُريدي مولد السيدة زينب " السيدة هي الأمان هي الرجا و الحما خدنا إيه م السياسة مدد يا سيدة مدد "

وسط كل الأمور السياسية , والإختلاف حول بعض القرارات هل هي دستورية أم لا .. هناك من لا يعبأ بكل ذلك , هناك من يعيشون الترحال كل عام دون إنقطاع مُشتاقين للتلاقي , طامعين في الرضا , يُسبحون ويذكرون طوال الليل حتي مطلع الفجر , يبيتون في الشوارع حتي يتسني لهم فقط لحظة ليضعوا فيها رؤوسهم علي جدران المقام قائلين حينها بكل حب وطمع في الأمان والرضا " مدد يا سيدة مدد " ..

مولد السيدة زينب .. إحتفال كبير يتم كل عام يداوم عليه الكثير والكثير من المُريدين والتابعين كباراً وصغاراً و المُحبين للسيدة زينب علماً بأن المرة الوحيدة التي تم فيها منع إقامة مولد السيدة كانت من قبل الحكومة المصرية  عندما انتشر مرض أنفلونزا الخنازير بمصر

 تبدأ التجهيزات قبل المولد بأسبوعين , لتنتشر الزينة والأضواء علي جدران المسجد بداية من مطلع شهر رجب , ويأتي المُريدين والأتباع من عدة أماكن خارج القاهرة , ويبنوا الخيام داخل الشوارع والحواري بمنطقة السيدة زينب , علماً بأن نتيجة كثرة المُريدين يجلس بعضهم في مداخل العمارات أو محلات اشحاص بعينهم في المنطقة , والأماكن التي يجلسون فيها لا تتغير فهي كما هي كل عام , ويقوم أيضاً ساكني  تلك الخيم بتوزيع منتجات قُراهم ومحافظاتهم علي أهالي الحواري بالسيدة مثل " الجبنة القديمة , القريش , والعيش الرحايا أو ما يعرف عادة بالعيش المرحرح .

وتتوالي التجهيزات .. ليأتي أصحاب المراجيح , وبائعي الطراطير , والحلاوة والحمص, ويأتي أيضاً أحد بائعي الشرائط الصوفية الممتلئة بأغاني المديح ليفترش الأرض حول المسجد  ولكن الأهالي يشتكون منه بسبب الصوت العالي للأغاني الذي يفقدهم متعة الهدؤ , أما بائعي السبح فهم طقس دائم حول المسجد ..

ويقوم البعض بالسير في حواري السيدة زينب قبل المولد بأسبوعين ليتغنوا بأغاني المديح بالمزمار والطبول وأحياناً ما يطلبون الإكراميات من سكان المنطقة .

يبدأ المولد في الثلاثاء الأخير من شهر رجب , ولكن المُريدين والأتباع يحتفلون به بداية من مساء الأثنين فتنتشر شوادر الذكر والمديح ,علماً بأن هناك شادر خاص بمنطقة  بعينها بالسيدة زينب تسمي " الدرب الجديد " هذا الشادر يستمر فيه الذكر والمديح الي فجر اليوم التالي للمولد .

أما عن أهالي منطقة السيدة زينب فلديهم عادة لاتنقطع كل مولد وهي قيامهم بطهي بعض الأكلات يوم المولد ليوزعونها علي مُريدي السيدة زينب والزائرين لعل أهمها " رز باللحمة , فول نابت , ورز بلبن "

وينتشر الأطفال فيركبون المراجيح ويلعبون , ويشترون الطراطير ذات الألوان الجاذبة لهم , وهناك بعض الشباب من ساكني المنطقة اعتادوا منذ الصغر الذهاب لشوادر الحمص والحلاوة المللونة التي يعشقونها .. ودراويش المولد يسبحون ويذكرون مُلفتين نظر الجميع .

وكان هناك العديد من ساكني المنطقه يفضلون الذهاب في الليلة الكبيرة للمولد ولكنهم توقفوا عن الأمر لعدة أسباب حيث قالت لنا فاطمة 23 سنة  وهي أحد سكان السيدة زينب " كنت بحب أنزل في الليلة الكبيرة بس بطلت بسبب التحرش والسرقة اللي بتزيد بسبب الزحمة " .

وينتهي مولد السيدة زينب , ويرحل المُريدين معادرين المكان فجر الثلاثاء أو الأربعاء ,.. وبعضهم يظل حتي الجمعة منهم من  يعود إلي منازلهم والبعض الآخر يظل في ترحاله ساعياً إلي مولد آخر  ليصبح المكان بذلك فارغاً .

ولعل من أهم المساوئ التي يشكو منها أهالي منطقة السيدة زينب هو ما يُخلفه المولد من كم كبير من القمامة تسبب فيها المُريدين والزائرين وبعض أهالي المنطقة .

ونـــــــــــــس

أغمض عنيا ساعات فأحس شعاع الشمس مدفيني 
ووقت ما أحب أتونس في ليل طويل , أنده للقمر , نفضل نتساير لقرب الفجر
, ونجومه قدام عنيا تتدلع وتتمختر وتتباهي وتتأمر ..
" حقها , هو مين في الدنيا أدهااااااااااا " ؟!!
 


ووسط الغضب بلقي نفسي ماشية طريق طويل عمال بيندهلي , ويحضني وآلاقي في آخره ضحكه ماسكه في أيد فكرة فأطمن :)

وما أنامش يوماتي إلا لما اسلم علي اصحابي " جوز حمام ما أقولكشي " فيهم الأمل كله , وطعم الحب من عشهم فااااااااايح .. اتبسملهم وأغمض عنيا وأنام .. أحلم ببكرة يكون أجمل من امبارح 


وكل يوم بعيش فيه بحس ولامؤاخذه يعني ان الحاصل فيه مهواش أقصي طموح ليا , جوايا أكتر و أكتر يمكن مبعرفش عن حاجات بعينها أعبر, لكن عارفه إني علي تحقيقها حاقدر , حاجات حساها وفـ بكرة شايفاها  :) 


ونس <3

إحنا اللي بنموت عشان سيادتك تعيش :(

بيسألونا طول الوقت في التليفزيونات إنتوا مين؟ وعددكم كام ؟ وعايزين إيه ؟ وتبع مين ؟ ..

بيسألونا ويسألونا بقالهم سنة ونص , وكل مرة بنحاول نجاوب برضه نفس الإجابة , وكل مرة مُطالبين ندافع عن نفسنا وعن حلمنا ودمنا اللي سال في الميادين ونقول :

إحـــــــــــنا ثورة , إحــــــــــنا بكرة , إحــــــــنا اللي مات وهو عايش , واثبت أنه عايش يوم ما مات !!

وادينا اهو بنقولها تــــــــاني في كل حتة للتليفزيون والجرايد والراديوهات إحـــــــــنا \

" اللي صدقنا الشاعر ميدو زهير لما قال : اسأليني يا حبيبتي ع اللي داير في البلاد اللي فيها صادروا حلمي وباعوا صوتي في المزاد , اسأليني اشمعني صابر ع المآسي المُلهية أقولك إني واحد م الغلابة الأغبياء اللي صبروا في إنتظار المعجزات والأنبيا , واللي فاق من وهمه فجأه لاقي كُفر قوم عاد , لسه برضه قلبه طاير كعب داير في البلاد .

إحــــــنا اللي صدقنا الشاعر رامي يحيي لما قال : حُر إني أعشق بلادي واللي حايفكر يعادي أتزرعله في حلقه مُر , وابقي حُر .

إحنا اللي صدقنا الشاعر ضياء الرحمن لما قال : مغمض وشايفك بتضحك عليا

\ الصبر مش دايماً جميل ولا كل تأخير بخير .. و

\ تراهني إنها بكرة حاتفرج ..و

\ إزاي يا نيل وأنت الوجود تمحيني من وش الوجود ؟.

إحـــــــنا يا عم اللي صدقنا بلاك تيما لما غنوا : حكومة عايزه ظبط .. و

\ فعل وفاعل مفعول به تعرب مجلس شعبك إيه ؟ مجلس طبعاً تبقي مضاف شعبك هو المُضاف إليه .. و

\ أنا حلمي عادي شكله عادي ومالوهش سبأه في أي ماضي هادينه ليه بس الآعادي ده لا عنده مال ولا له أراضي ومالوش مكان غير قلبي أنا !

إحـــــــنا اللي صدقنا زمان في المدارس تحية العلم , وحفظنا النشيد بالقلب قبل اللسان , وقولنا بفطرة الحب " بلادي بلادي لكي حبي وفؤادي "

إحــنا اللي صدقنا مفهوم الكرامة , وآمنا بصلاح جاهين , والشيخ إمام ..

إحنا اللي طيرنا طيارة حلمنا من فوق برج الحمام ..

إحنا اللي صدقنا المسيري وعبقريته , وصدقنا أن بكرة احلي بينا ..

إحنا اللي مش عارفين نشتغل عشان مالناش برتيته نتمسح فيها , ومعرفناش نتعلم صح فعلمنا نفسنا بنفسنا , وكمان مش عاجب !! .. إحنا اللي فرصتنا في الجواز والخلفة أقل عشان العمر بيتسرق ..

إحنا اللي مابنخافش الموت , ويوم ما بنقع مضروبين بالرصاص أو مخنوقين بالغاز ونسلم روحنا للديان حضراتكم بتتفرجوا علينا قدام الشاشات بكل جبن , وموت قلوب وتنَظروا وتحللوا وتقولوا " اه ده شهيد ولاء ده مش شهيد ده بلطجي ويستاهل القتل !! "

إحنا اللي آمنا بتراب البلد دي وسفِناه عشان مكنش لنا غيره زاد

إحنا اللي وهمونا برأسمالية المنتخب وحولونا لبلد النادي الواحد , وخدعونا بأن فوز المنتخب هو أكبر إنتصار للبلد , فحزموا سعد الصغير والحضري بالعلم ورقصوا علي جثث إخواتنا اللي غرقوا في عبارة قال إيه السلام !! ..

بالظبط زي ما كتير دلوقتي بينظروا وبيضحكوا ويرقصوا علي جثثنا ودمنا اللي سال ولسه بيسيل عشان شوية مصالح أومرتب , وإنفراد في برنامج !!

إحنا اللي موتنا في الميادين , وفي محمد محمود وماسبيروا , ومجلس الوزراء واتسحلنا واتحاكمنا ولسه بنتحاكم عسكريا , إحنا اللي طول الوقت مشتومين ومشكوك في وطنيتهم وفي دينهم وفي سمعتهم ,وأنكشف علينا عذرياً واتقتلنا غدر في بورسعيد.. ولغاية النهارده محدش حاسب اللي قتلنا رغم أننا شاورنا عليه وورناه للعالم كله صوت وصورة ..أقولكم \ إحنا اللي دهنا الهوا دوكو !!

إحنا ...إحنا يا سيدي اللي صدقنا الأبنودي لما قال : " من حق كل الناس إنهم يقفوا أو يكملوا , يمشوا أو يتكعبلوا , يتوهوا أو يوصلوا "

إحنا اللي صدقنا أدب نجيب محفوظ , وحكمة الغزالي ومحمد عبده ..

إحنا اللي بنموت عشان وطن يعيش ..

إحنا اللي بنطالب بالحرية والكرامة والمستقبل , وإنتوا أقصي أحلامكم أن النهارده يعدي بسلام, والإستقرار , وعجلة الإنتاج , ومراعاة مصالحكم اللي بتيجي علي جثثنا !!

إحنا اللي حانملك بكرة وكل من ضحي بالوطن وساهم باللعب في مستقبلنا وقتلنا بكلمة أو رأي أو رصاص وغاز حايورث الندم والعار ..

إحنا اللي بنقولكم الأتي : ساذج جداً وعبيط اللي يطمع في وطن , وأعبط منه اللي يصدق أن الدم حايروح هدر , واللي يفكر إننا حانيأس أو نمِل .

إحـــــــنا ...إحنا الثوار .. إحنا مصر .. إحنا الصغار أصحاب العقول الكبيرة , اللي الكبار شايفينهم عيال وللحق مش كل الكبار .. إحنا المُندسين الأحرار بكرة لنا , وشمسنا حاتدفي بلادنا وتنور طريقنا عن قريب J

الثورة مستمرة , ويسقط يسقط حكم العسكر.

ن.س

ليه أنا نازله يوم 9/9 :)

Edit

في أسباب كتير تخليني أنزل ميدان التحرير يوم الجمعة 9/9/2011 أن شاء الله يعني علي سبيل المثال :

------------------------------------------------------------------------------------------------------------------

* أنا نازله عشان رمضان للأسف كان بطعم الفلول , والقنوات الخاصة ماشاء الله أغلبها كان عشان يطلع للنور أخد الأذن من النظام الفاسد اللي خلعناه يعني هما جزء من المنظومة الفاسدة , ومش بس كده دول في رمضان عملوا اللي عليهم وزيادة شوية في ترتيب وتنظيم ظهور الفلول وكل من أهان الثورة , واللي لسه بيدافعوا عن المخلوع  ومفيش حد فيهم ع الأقل أعتذر , وكأن الثورة ما قامتش !!

* نازله لأن مناصب مهمة في الدولة زي الوزارات والمحافظات وغيرها لسه بيتعين فيها أبناء مبارك !!

نازله لأن التعليم محتاج يتطهر والطلبة من حقهم يختاروا أساتذة الجامعة ورؤساءها  بدل اللي عينهم أمن الدولة .

*نازله لأن كتير من القضاه والمحامين بيأكدوا أن الأدلة اللي قدام القضاه اللي بيحاكموا مبارك غير كافية وسهل جداً المحامين بتوعه يطلعوه براءة بسهولة بسبب عدم كفاية الأدلة وعدم جودة التحقيقات !

*نازله لأن الداخلية لسه بتستعين في شغلها بالطجية والمسلحين خطر , والسرقة اللي في عز الضهر تشهد وحوادث القتل الفظيعة في الجرايد تشهد , ده غير البياعين الجائلين اللي منتشرين جداً وبيغيروا ملامح شوارعنا , بس بصراحة الداخلية مشكورة بتنزل من وقت للتاني عساكر مرور بتنظم المرور أحياناً .

* نازله عشان أقول إن في فرق بين العفو والتسامح وبين العبط والهبل والسماح لغيري إنه ياخد حقي  اللي عشان أنوله دفعت دم :)

* نازله عشان رموز كتير من رموز الفساد في النظام المخلوع نازلين إنتخابات مجلس الشعب وكأننا معملناش ثورة وفاكرين ان الذاكرة إتمحت ومش عارفينهم ولا عارفين وشوشهم الكدابة .

* نازله عشان كرهت الفُرقة اللي إحنا فيها وعشان الأحزاب والقوي السياسية لغاية النهارده ماشوفنلهاش برنامج أو رؤية محدده , الكل بيلعب بأوجاع الناس وبس وبيرفعوا شعارات براقة كرهناها ده غير انها مابتتحقش كمان , وكمان بيحاربوا بعض بينا وبيقسمونا علي بعض وكأننا ورث !!

* نازله عشان أعرف مين هو الشعب اللي يريد اللي كل رواد البرامج بيتكلموا عنه

نازله عشان عصام شرف تايه ومش لاقينه يا جدعااااااااااااااااااااان :(

* نازله عشان مستقبلي أنا وغيري إحنا اللي نرسمه مش غيرنا يمشينا علي هواه

* نازله عشان دم الشهيد .

* نازله عشان أجيب حقي اللي هو أصلاً من حقي .

* نازله عشان أكبر حملة شحاته شوفتها في رمضان محتاجة أقولها  ( طظ  ) , نازله لأن الحكومة اللي مَرضتنا وفَقرتنا سنين طويلة بتعايرنا بمرضنا ,  وبتلعب بأوجاع أطفالنا قدام الكاميرا وبتاخد مننا قال إيه  اللي عايزه تداوينا  به !!

* نازله عشان نفسي أهل الدين يهتموا بالشأن العام الليو لا ينفصل عن الدين بالعكس ده هو جوهره و نفسي اسمع أهل الدين يقولوا كلمة حق في وجه سلطان جائر , نازله عشان نفسي أسمع خطبة جمعة تعبر عن حالي أنا وغيري , نازله عشان نفسي اسمع الإمام اللي واقف ع المنبر بيدعي لبلدنا مش لزعيم فالسو  , نازله لأني نفسي الاقي اهل الدين بيتعففوا عن إهانة غيرهم والدعاء عليه لمجرد إنه خالهم !!

* نازله عشان أكوام الزباله اللي ماليه الشارع تقل بقي  :( بمعني أصح كده ننشط المحليات اللي نامت يفي الخط

* نازله لأني  عايزه اعيش في دولة مدنية تكفل الحرية لكل المواطنين في ممارسة السياسة والفكر والعقيدة , نازله عشان أجورنا لازم تناسب متطلبات حياتنا , نازله عشان وظيفة مناسبة ومحترمة ليا ولغيري نخدم بها الدولة .. نازله عشان بحلم ببلد ديموقراطي بمعني " بلد أقل فساداً " يعني مش المدينة الفاضلة زي ما بيروج البعض 1 لكن بحلم بمدينة ترفع من شأن الإنسان عشان هي نفسها ترتقي من خلاله .

* نازله عشان سيادة القانون وإستقلال القضاء

*نازله عشان بدأوا يصدرولنا اليأس والضعف من تاني ويقولولنا أن ليبيا وثوارها أحسن مننا لأنهم كملوا المشوار وماوقفوش إلا لما جابوا حريتهم بأيدهم ومساعدة الناتو طبعاً , لكن هما بينسوا أن ليبيا الشقيقة اسقطت نظام فردي " نظام القذافي " اللي استعان في قتل شعبه بمرتزقة أفارقه أما مصر فالفساد فيها من أول الراس لغاية صوابع الرجلين الفساد فيها مؤسسي موجود في كل بيت وفي كل دايرة وكل شركة موجود في العشوائيات وفي كل نقطة تراب في شوارعنا

الثورة المصرية " ثورة الورد البلدي " فتحت باب التطهير لنظام فاسد بقاله سنين والطريق لسه طويل ومكملين

نازله لأن نظام بلدنا مختلف عن نظام أي دولة تانية لكن الثورات كلها واحده وهدفها واحد إسقاط النظم المستبدة

عشان كده نازله أقول لليأس لاء أنا مكمله

نازله أقول للضعف لاء أنا مكمله

نازله أقول لبقايا الفساد غصب عنكم مكمله وحتي لو المشوار طويل بلدنا تستحق

* نازله عشان الأساتذه اللي بيعايرونا بتركيا واعتقد هما معروفين جداً , محتاجه أقولهم سبحان الله عمالين تعيرونا بنظام ودولة سبقونا بسنين كتير وإحنا لسه بنبتدي المشوار أصلاً , طب اتكسفوا علي دمكم وانتوا بتطلبوا من ثوار كل اللي حيلتهم التنظيم والفكر ونور ينوره به الطريق لنفسهم ولغيرهم ولجيل جاي إنهم يحصلوا تركيا في السباق

نفسي اقولهم صدعتونا بعجلة الإنتاج  ولو عايزينها تمشي بجد خليكوا علي جنب شوية وادوهالنا ندورها وحاتشوفوا حانعمل ايه ؟

ولو حانعاير بقي بجد يبقي لازم برنامج بني آدم شو من تركيا لازم يتذاع حصرياً لمبارك في سجنه عشان يعرف ان آل مصطفي أتاتورك سبقونا بمراحل .

مكملين معاكي وبيكي يا ثورة الورد البلدي

...!! ماتقولليش يا بابا

بعد موت الأم بقي كل شئ مالهوش أي طعم , البيت فاااااااضي رغم أنهم جواه , كل شئ في مكانه بعد أخر لمسة منها , وكأن الحيطان والهدوم وحتي الكراكيب في حزن شديد ع الست اللي كانت بتجمع الكل ومن بعدها كل شئ مستخبي ظهر وبان والظلم زاد , والبُعد بقي في أبهي صورة وأتحول البيت لأكبر بانسيون أصحابه حتي ما بيرموش السلام علي بعض !!

أما هي فاتعودت علي كده وبقيت مرتاحة في خلوتها " أوضة ع الشارع بيسموها صالون " مع إن مبقاش في صالونات أصلاً دلوقتي لكن هي سعيدة بها لأنها أخر مكان الأم قعدت فيه واتوفيت فيها  , الأب زادت الامبالاه عنده وبقي بيتحكم بالفلوس بإعتبار إنها المعبرة عن رجولة ناس كتير فاقدين للمعني الحقيقي للرجولة , وهي تستحمل وبتقول كل شئ يهون عشان البانسيون يعيش ,وتقول لنفسها : أهو علي الأقل نبقي مع بعض حتي لو إحنا مش مع بعض .. لكن اللي كان فوق أي إحتمال هو إن الأب بسرعة بسرعة أستعان بست جديدة تداوي جراحه وهي كانت بتموت كل ما تحس أد ايه المدة قصيرة علي وفاة الأم وهو مش قادر يحترم حتي العشرة , طب بلاش طب مشاعر الولاد " ابنه , ابن اصغر منها سناً , وطفل اصغر منهم هما الأتنين " .. 

هي في حزنها ووجعها بتحاول تلم شمل أخواتها 
الأخ الأصغر منها بقي ابعد بكتير من الأول عنها وحتي عن نفسه وبقي خيرة في مشاعرة للي بره مش للي جوه كالعاده
الأخ الأصغر : مش فاهم لسه وفيه طيبة الأم بفطرته جداً ومحتاج لحضن يضمه ميعرفش غير انه يلعب وكأنه لسه بيحبي .

الأمر في البداية كان محسوس بالنسبة لها مش ملموس , لأن الأب بدأ ما يتكلمش عن الأم خالص , كانت صورتها علي موبايله وفجأه إختفت , وبدأت أغاني أم كلثوم تملي البيت رغم أن ده مكنش موجود قبل الوفاة خلال سنين العشرة , ومكالمات هاتفية بالليل بالساعات , والنور ينطفي , ورنات ورسايل ,لغاية ما البنت في يوم فتحت موبايله ولاقيت رسايل مبعوتاله عمرها حتي ماتتخيل إن بنت في سن المراهقة تكتبها لشاب زيها , وفتحت بقها في استغراب موجع وقالت " ياااااااااااااااااااه " للدرجة دي وبكيت جداً وقالت بصوت عالي " ده أمي مكملتش سنة " !!

وبدأ الخلاف بينها وبين الأب بعد رجوعه وسألته عن الرسايل فأنكر بشكل يأكد وجود ست فعلاً , أصل العيون ما بتكدبش بالذات لامؤاخذة في الحب .وإتخانقوا خناقة كبيرة , والبنت أنهارت جداً وصوتت بطريقة هيسترية هي نفسها إستغربتها جداً وبقيت تجري في الشقة مش عارفه تعمل إيه ؟ وهو مش عارف يرد علي أي كلام , وقسوته طغيت علي ملامحة .. وفجأه من كتر صواتها وخوفه ان الجيران تسمع وتعرف ايه حصل ضربها بالقلم , بس للأسف ده زادها قوة . وانتهي الكلام بإنفجار غضبها كالأتي : مسكت بلي من اللي بيلعبوا به العيال وكسرت به شاشة التليفزيون .

الأيام تعدي وهو بيتحكم فيها بالفلوس يديها ما يديهاش براحته , وأحياناً يرميلها الفلوس ع الطرابيزة عشان تلمهم زي الخدامين وهو فرحان بإهانتها ,وكأنها مش بنته وده شئ مش جديد بالنسبة لها فكانت بتقول لنفسها " هو انا زعلانه ليه ؟ إذا كان اللي اتحملته سنين واتحديت اهلها عشانه جوعها وأهانها وخانها علي حياة عينها و ما إحترمش العشرة بينه وبينها وكان قاسي عليها , هايبقي حنين عليا أنا ؟ ! " 

وفي يوم كانت نازلة من البيت فراحت تطلب منه فلوس 

هي : بابا عايزة 5 جنية 

كانت بتقول بابا بوجع لأنها مش حساها

الأب : معييش 

ولأنها عارفه أنه معاه بس بيذلها فكملت كلامها تاني وقالت : عايزة 5 جنية عشان أنزل 

الأب : معييش 

هي :يا بابا عايزة 5 جنيه معلش 

الأب : ماتقولليش يا بابا 

وهنا كانت الصدمة و

للحديث بقية 

عن المتتالية القصصية بعنوان " ماتقولليش يا بابا " 
وهايكون فيها رسم للشخصيات 
وهي معبرة عن وجود الراجل في حياة المرأه سواء " صديق / أخ / حبيب / أب / أو حتي ابن " 

أقنعة

لم أكن اعلم أن الأمر سيصير هكذا ...وأن الدائرة بداخلي ستزداد اتساعاً يوماً بعد يوم
وكل من حولي سيتحولون إلي أقنعة تسير علي الأرض , منها ما هو بائس , متفائل , مشرق , باهت , كاذب , صادق , ومنها من يلعب دور البلياتشو الضاحك الباكي , أو البلياتشو اللص الذي يسرق كل ما هو جميل مدعياً الحزن للضحك علي ذقون الأخرين , وهناك من هم متفرجين علي العالم دون أن يؤثروا بأي فعل , وكأنهم ضيوف علي الأرض فقط أو عابر سبيل لا يهم أن مر أمامك أم لا فهو غير مؤثر , ويأتي المزيد .....

يبدأ اليوم بترحال , وينتهي أيضاً بترحال , ولكن ....
الإختلاف بين كلاهما هو أنا , وأنت , والأقنعة ...تشرق الشمس علي أرض اصبحت ممتلئة بفقر في كل شئ , فقر المشاعر , الأحاسيس , الدموع , الخشوع , الصدق , الأمانة , الإخلاص , العمل , الفكر , الفن وغيرهم ..فالفقر ليس فقر الطعام والشراب والمال الذي يأتي بهما فقط ..بل ما نعانية الأن هو أبشع وأخطر أنواع الفقر كما قالها لي أستاذي الذي اعتز به والذي اعتقد بأنكم في يوم ما ستعرفونه جيداً ..

اركب لأصل لمحل عملي , بجواري العديد والعديد من البشر ينتمون لمختلف الطبقات ولكن ها نحن اصبحنا سواسيه يقودنا من هو أقل منا و يعاني أكثر منا من فقر الطعام والشراب وكافة الأشياء , وقد يحالفنا الحظ ليقودنا من هو أغني منا في كل شئ ونعتقد مخطئين بأننا أفضل منه ولكن هيــــــــهات فنحن في ظل عالم التضاد المعكوس هو المقبول والمقبول هو المعكوس بل والمنحوس أيضاً ولرب العباد حكمة في ذلك ... ننطلق ليظل الجميع في وسيلة المواصلات صامتين أو يبالغون في التحدث " أينعم فنحن كعادتنا لا نملك الوسط " ...

تجبرني النافذه ان انظر علي عالم أراه كل يوم بلا ملل .. كلما نظرت له بترقب اشعر وكأنني أراه لأول مرة.. يمكنك ان تفسر ذلك بالهروب مما أنا فيه , أو بلحظة صمت أقتنيها بيني وبين ذاتي , او شئ بلا تفسير ...

يظل الجميع كما هم طوال الوقت يترقبون بعضهم البعض يتصيدون اخطاء بعضهم البعض دون ان ينظرون إلي انفسهم , وأظل انا وحدي أترقبهم دون أن يشعرون بي لأكتشف في النهاية بأنني مثلهم دون إختلاف وأنهم يترقبونني حتي وإن لم يروني ...

حمداً لله وصلنا إلي نهاية المطاف بعد رحلة طويلة وكأنها عمري بأكملة يمر أمامي في لحظات.. عمر قابلت خلاله كافة أنواع البشر وتساوينا جميعاً بمختلف أفكارنا ونوايانا ودياناتنا بمكان واحد لنصبح ولأول مرة سواسية دون إرادتنا ودون أن نعترض وندعو للتمييز مدعين بأن تلك هي الحرية وأنها أيضاً دعوة للمساواة , ينزل الجميع وأنا معهم ..لا أنظر للخلف حتي لا أري تلك الأقنعه التي رافقتني طوال الطريق وهم أيضاً لا ينظرون .. اسير واسير بخطي واسعة ليست مفتعله ولكنها عادتي التي احبها " السير بخطوات واسعة " ..

أتلهف في طريقي لرؤية كل ماهو جديد أو ماهو قديم لأبحث فيه عن الجديد الذي لم أره امس ..تبهرني إعلانات الطرق , همسات البشر , سيارات تمر بجواري بسرعة وإحتراف , طيبة في قليل ممن هم حولي ..اردد بعض العبارات لأتذكرها , اغني ,أو اصمت لأفكر .

أااااااه وشوش تمر أمامي تحكي تاريخ مر وسنوات لم أرها لصغر سني , ولكن ها أنا أراها في ملامح هؤلاء , أري الحزن والفرح وتنهيدات تخرج مع اَهات لمن كانوا أحباب ,..عجوز يقولون عنها شمطاء كانت منذ سنوات اجمل الجميلات , وعجوز يقولون عنه خردة من بقايا الزمن , وقد كان أبسط الحكماء , شباب قد مضي وشباب قد أتي وها أنا بينهما أقارن أيهما اقتني ما سوف يأتي أم ما أحياة الأن , أم ان العبرة والأساس فيما مضي؟ ....

ثورة قد كانت وفكر قد مضي , ومبدأ عبر ولم يعد ..صار كل شئ سيان لا فرق بين كبير وصغير , لا فرق بين طيب وشرير , لا فرق بين مبدأ وضياعه , بين عدو وصديق فالكل سواء ...نعم لا يمكن أن ألوم أحد في زمن أصابة الفقر في كل شئ , و تلوث به الفكر فأصبح فيروس يصيب العقول ..!!

لالا لا تبدأ باللوم عزيزي فهذه ليست رؤية تشائمية ولكنها تجربة واقع بحثت فيها جاهدة عن الأمل في كل شئ حتي ثيابي و كانت نتيجتها رباعية لصلاح جاهين احفظها ظهراً عن قلب " وحدي لكن ونسان وماشي كده /ببتعد معرفش أو بقترب ..! "
فأهدأ إذن يا " ضميري " ..

بحثت جاهدة عن الأمل في كل من حولي , وفي كل شئ فوجدت العبارة الواقعية في ديننا تتحقق وبجدارة " كل عام ترذلون " ..بحثت عن الحب فوجدت علاقات معقدة ينجرح فيها المحبوب والحبيب أو يجرح فيها المحبوب الحبيب , أو العكس والقليل ممن رحم ربي ينعمون بروعة ورقة الحب ...بحثت عن الأمان فوجدت الجميع لا يثق في الجميع ويترقبة بقوة ليثبت عدم قدرته علي حمايته , ووجدت أن الفرد منا لا يستطيع حماية نفسه فكيف به إذن أن يحمي غيرة !! ...بحثت عن الصدق فوجدت الجميع يكذبون ويتجملون ينافقون وبألسنة فصيحة يعاتبون من هم في قولهم يصدقون !!!

...بحثت عن العمل فلم اجد سوي الكسالي أو من بالعمل عمرهم يفنون , أاااااه أصابني التعب وتؤلمني قدماي أرغب في الجلوس كي أستعيد نشاطي لأبحث بين طيات البشر عن الأمل من جديد ...

تحرقني شمس الحياة ولكن لهيبها يملئني بالدفء ..تنعشني أصوات الطيور من حولي , فهي تغطي علي التلوث السمعي الذي يحيط بي من كل جانب ..تباً للبشر حتي أصواتهم أصبحت تصيبني بالإزعاج , متي سأتمكن من الوقوف امامهم لأعترض وبصوت عال أقول : تباً لكم أشبااااااااااااااه البشر فلتصمتوا وإلا قتلتكم

اجلس بالفعل علي مقهي افضله , وحدي أجلس بلا خجل فقد كنت اخجل في البداية أما الأن فلا ..فيجب عليهم هم ان يخجلون .. اترقب تصرفاتي واقول لنفسي هكذا لن يقول أحد عني شئ فأنا اجلس بكامل إحترامي ولا يوجد بملابسي ما يخدش الحياء أو يثير أحد , وأنا لا أضع المساحيق إذن لن ينظر لي أحد وهذا ما أفضله ...ولكن تمر بضع دقائق فأجد أن كل من حولي ينظرون لي , وبالترتيب يسلمونني لبعضهم البعض وكأنهم يهمسون لبعضهم عني في صمت ..فأقرر أن أنساهم وكأني بالمقهي وحدي , وبالفعل أطلق لخيالي العنان واكتب أفكاري بعقلي سطر وراء الأخر , واخذ ورقة من حزمة اوراقي وأطلق قلمي ليعرفني ما بداخلي ..أقرأ وأكتب , أتخيل أتراقص علي أنغام أعزفها بداخلي ... ثم يأتي من يسألني وكأني أميرة قصري : تشربي حاجة ؟ ...
ارد عليه : شاي بالنعناع لو سمحت

وأستعيد طعم الشاي بفمي وكم كان رائعاً بالأمس وكل أمس فهو يعيدني مرة ثانية لنشاطي بعد فقدانه طول تلك الساعات ..يأتي الشاي فأنظر لمن حولي دون قصد أجدهم في ملكوت أخر كل منهم في دنياه واصبحت انا من يترقبهم واحداً تلو الأخر ياااااااااااه حقاً الأيام دول ..

يستمر الوضع هكذا حتي تأتي هي لتجلس بجواري , لا أعرف إن كنت احبها او اكرهها , ولكني لم أكرة سوي بعض الأشخاص انا فقط من يعرفهم , ولأسباب يجب وفقاً لها أن تكرة أي إنسان لذا فقد كرهتهم وبشدة ..إذن فأنا لا أكرهها , وأظل أتساَل هل وجودها سبب فارق في حياتي ؟ , وإن غابت هل سأفتقدها ؟..تضحكني , وتبكيني , تتلهف لرؤياي , تغضب حين ابعد عنها , تريديني وحدي لها , صندوق ترمي به أسرارها وأنا استجيب ...

تجلس وتبتسم وابادلها الإبتسامة , تنظر بعيناها لي وكأني طفلتها الصغيرة التي تخشي عليها من كل ما هو اَت , واقدر لها ذلك , ولكن أحياناً امل من تكراره طوال الوقت ..تهمس لي بكل شئ , وما مرت به حتي جاءت لمقابلتي ..اسمع واسمع حتي اصل لمرحلة الإنصات بلا ملل , لا أتحدث عن نفسي كعادتي , ولكن اقول رأيي حين تطلب إستشارتي أو اسرع في غضب لأقول ما أريد حين تتفوه بشئ يزعجني , تتقبل ذلك أحياناً وأحياناً ترفضه وانا اقدر ذلك فهي مثلي ومثل كل من حولنا بشر له طاقته التي أحترمها ...

فتاة في الـ (....) من عمرها نشيطة , محبوبة , تملك فكر في وقت لا يوجد فيه من يجبر عقلة علي العمل ..تطمح دائماً في الوصول لأعلي المراتب ومن منا لا يفعل مثلها !!..تتوهج مشاعرها حين يذكر حبيبها ولو بالخطأ , يمكنك معرفة ما بداخلها مما بعيناها , ولكنها تبحر بعنانها لتصل إلي السماء فإما أن تصعد وتجلس علي أنقي السحب , وتلامس النجوم , وإما ان تغرق في بحر الأوهام لتسقط في الهاوية , وتصر بشدة أنها لم تخطئ بل هو القدر وااااااااااه من قدر نلقي عليه أخطاؤنا ....

ويبدأ الحديث من حيث انتهينا امس بل أن اليوم لم يتغير عن الأمس فهو نفس الموضوع لا تملك سواه واقدر ذلك وأراعيه ....فتقول لي بغضب محمل بلهفة أنثي : " قالي إمبارح وهو بيكلمني ممكن أقابلك ؟ وأنا استغربت ده إحنا بقالنا فترة كبيرة مش بنتكلم ..فقولتله أوك , وروحت شوفته لكن لاقيته غريب وبيتكلم بطريقة غريبه , وبيلمح لـ ...لـ ...لـ "

في إيه ما تقولي
أوعي يكون اللي في بالي
أيوة هو ده بالظبط
أممممممممممممم
طب وبعدين ؟؟
ولا قبلين اتكلمنا شوية ونزلت وانا مصدومة...لية قالي كده ؟ وليه دلوقتي ؟ وليه بعد فترة كبيرة مش بنتكلم ...؟!!!!!
بس استني بس انتي اللي بتتكلمي عنه ده مش ممكن يكون كده مش ممكن !!
هو إيه في حياتنا مش ممكن ؟؟

وهنا اصمت ولا أرغب في التحدث تعجباً مما أسمع فقد أختلط الحابل بالنابل , ورموز حولي تنهار , ورجال تسقط في بئر المعاصي بلا رجعة ...


وللحديث بقية ..

إمضاء :
ن.س

... ردي علـيا يــا ضـنايا قبـري خلينـي أنــام

حوار كنت اتمني يحصل من زمان ....
صراحة واجبه مع نفسي ومع الأنسانة اللي كانت ومازالت وهاتفضل سبب استمراري في الحياة ...
يمكن ماقدرتش أكتب الحوار ده قبل كده لأني كنت بعوض نفسي بنظرة عنيها , بكلمة منها , بنفس خارج من صدرها يشق صدري ...لكن قررت اكتبه واعرضه يمكن لنفسي قبل ما يكون لأي حد .. فخلينا نبدأ

وحشتيني ..
وانتي والله يا ضنايا ..
فاكرة ملامحي يا أما ؟
طبعاً يا بنتي , وأنا من أمتي نسيتها !!
ده من وأنتي في حشايا حتة لحمة حمرا وأنا عارفاكي وحساكي وعارفة وحافظه
ملامحك ..

ياااااااااااااه للدرجة دي !!
وأكتر يا حتة مني
بس زعلانة منك يا بنت بطني
ليه بس يا أما ؟
مقصرة في حق ناس كتير , ومقصرة في حق نفسك , وفي حق ربك
ده أنا جيتلك في المنام زعلانة منك وقولتلك من غير كلام إيه اللي المفروض
تعمليه
صح يا أمي عندك حق وهاحاول أصلح تقصيري ...

تعبانه أوي يا ماما ..
من إيه يا بنت بطني اشكي وفضفضي ..تعالي بس كده وعلي حجري اقعدي وعلي صدري اسندي وارمي علي كتفي حمولك
: أااااااااااه يا أمي .... الطفلة الصغيرة بنت بطنك تعبت والدنيا بتحاول تغيرها بنتك اللي كان كل اللي يبهرها ويسعدها في الحياة ( فزورة لنيللي أو شريهان من قبل ما تعرف مين هو فهمي عبد الحميد , و كان يبهرها بوجي وطمطم وصوت هالة فاخر من قبل ما تعرف مين هو رحمي , و كان يسعدها إعلان ريري والشمعدان , كان ينور تفكيرها المسرح بأضوائه وضحكة جمهوره من قبل ما تعرف ان شوية الخشب اللي واقف عليهم شوية بشر بيمثلوا ده اسمه مسرح ...اللي لما كبرت شوية بقي يبهرها جرنال علم في حياتها كتير, علمها قبل ما تقرأ أي كتاب , وكانت تدور بين سطورة علي كلمة أو جملة تلمسها من جوفها , كان بيبهرها عالم منفتح رغم أنه في الحقيقة أصل الإنغلاق ..كان يبهرها كلمة بحبك من صديق أو حتي إهتمام ,كان يهزها حضن عفوي من الغريب يضمها بشدة في وقت هي فيه في أشد الإحتياج للمسة حنان , كان يبهرها الجمال في مظهر عربية بأربع عجلات ماشية تتمختر علي الأرض لونها جميل أما عن سرعتها وهي كام سي سي مايهمهاش .. كان كل مناها كتاب تحبه ويحتويها مش مهم كاتبة مين ؟ المهم تتوه جواه وبين سطورة تحس كل حاجه ماحستهاش , يبهرها لوحة ترسمها وبعد ما تخلص تبصلها , وتسأل نفسها 100
سؤال :

أنا عملت ده إزاي ؟
معقول ده قلمي اللي رسم ؟!
وتكتشف بنت بطنك فجأه إنها نسخة منك , لكن إيه جمبك أكون ؟؟؟..
خطي نفس خطك ..
حتي إيدي حتة منك..
أيوه يلملم شتات روح طفلتك لوحة غامضة واضحة مش مهم , لكن ضروري تكون لها فاهمة وألوانها تبقي شمس وسط النهار سايبه بصمة ...

ويفصلها عن ذاتها خيل أصيل , أسمر كحيل , كل مناها بس منه تقرب تهمس له حبه عن المحبه اللي له شالتها سنين , يوجعها عيونه اللي مليانه دموع ما يشوفها غير اللي حس بألم يسوع ولو كان مالوش ملة ولا عنده دين ...

يكفيها بس موجة بحر عالية أو هادية مش مهم , ما البحر في عز غضبة أو حنيته برضو صامت حزين , لكنه بالنسبه لها كاتم السر الدفين ...تشكي له يوم ورا يوم وهو عليها بموجه يرد , ولقلبها أقرب ما يكون ضحكة الدلافين من بين كل الكائنات اللي خلقها ربنا هما دول بس الأقربين بغض النظر بقي عن البني أدمين ...

هزها بعفويتة صلاح جاهين .. وبسياستة وقوته عبد الناصر
وبإصراره علي مبدأه نجيب سرور .. وكتبها بحنيته نزار قباني
جذبها بفكرته بيرم عم الطيبين .. وبفنه وشغلته علي المسرح صبحي الحزين

يااااااااااااه حمل تقيل .. سياسة , علم , ودين ( وأنا بينهم مين أكون ؟ ) ...
تعرفي يا أمي سمعت مرة حوار بين أب وضناه كان بيقول :
عرفوني يا أبا راجل مجدع همام ..
والبنت وسط الزحام كيف تبان ؟..
لاع كتير ده ماهوش كلام ..
ده أقوي من السهام ..
كفاياك يا قلبي كفاياك ملام ..
اَباي عليك كفاياك يا ولد , كفاياك كلام ..
ماعادش نافع ..عالم منافع
وعليك أهوالوقت أخر , الدنيا إكده عايمة وهاتفضل حتي الزوال
وأنت يا ولدي يا دوب تنام ..
وأديتك يا أبويا ضهري ولنفسي قولت :
واااااااه ومن البداية ليه السؤال !!!!
وفي النهاية :
يا ناس يا عالم يا دنيا فانية
بمثقفينها وبعلمها وبسياسة تافهه وبالناس المنافقه
قررت أنا ..قررت أسيبكم
وأقوم أنااااااااااااااااااام
خلص الكلام , يلا روحوا
ومن غير سلام .

إلا يا أما ده يبقي يأس ؟
ولا حكمة ؟
ولا شئ مالهوش تفسير ؟
سكووووووووت وصمت منك ليه كده ؟..مصدومه فيا , ولا عليا خايفه ومني متأكده ؟
روحتي مني فين يا أمي لسه لكي عندي كتير كلام ...
أقولك شئ جوايا وماتضحكيش مني ...
فاكرة لما بخطوتك كنتي تمشي واحسك في الفجر قايمة ترددي بصوتك الأذان , تتوضي يا قلبي بمية ساقعة في عز الشتا لجل ما تدعي في ليل عليل منوره بدر التمام ...
لا عمري سمعتك بتقولي إيه ؟ ..ولا عمري سألتك ..لكن ياما سمعت أنين وأهات كنتي دايماً تصلي بالساعات لا يوم زهقتي , ولا يوم حسيتي بملل , والسبحة جمبك ترددي بها يااااااااااارب
سبحانك ياااااااااااااارب
أنت أكبر من أي شئ
الحمد لك , والشكر لك
بستغفرك من كل ذنب ...
وحشني صوتك , وخطوتك , مية وضوئك , وسبحتك , وصوت سجدتك ..
هاستني بكرة في نفس المعاد , فجر تاني أسمع فيه صوت خطوتك في ليل عليل منوره بدر التمام ...

_ أنتي الوحيدة اللي كنت اكلمها عن عبد الناصر وأشوف في عيونها حنين وفرحة زمان اللي راحت من سنين , يااااااااه بشوفك في فايزة أحمد وعجبي يا زمن الأم فايزة وبتحب فايزة أما يأمي عليكي حاجات .. بشوفك في وردة وغناها , وفي رقة نجاة في كبرياء عبد الحليم , وثقة كوكب الشرق , بشوفك في حسنة بني ساكنة إيديا من يوم ما أتولدت وكأنها علامة أول بوسة منك علي أيدي في سبوع حضوري لدنيا البني ادمين .. بشوفك في شارع بلدنا جاية من السوق شايلة الشنطتين إشي خضار وقوطه وجزر وبامية بشم ريحتها من عالسلم , أقولك سر ( أكلك رغم شكوة الكل منه ومن بساطته إلا أنه الوحيد اللي له طعم في حلقي ومازال ) ...

قوليلي يا ضنايا عاملة إيه مع سمر ؟
يااااااااااااااه بتحبيها يا أمي صح ؟
يكفيني إنها حبيت ضنايا , عليت في نظري لما في صغر سنها طلعت عارفه ربها وفي عز عمرتها فاكراكي بنت ناس من قلبك قريبة , وصوتها بس كنت بشوفوه بيسعدك حتي أهلها بتعتزي بهم وتحكيلي عنهم , وكنت أسمعك ....

بس قوليلي برضو عامله معاها إيه ؟
معاها برغم إني مش معاها , بحبها ..بحسها ..مش عارفه أوصف بس ساعات يا أمي بتكسف أقولها : ( معاكي يا بت لاقيتني , بضحك معاكي من قلبي , باكل معاكي , مش بخجل منك , ويوم شدتي حضنك الشئ الوحيد اللي كان محتمل , من وسط كل الناس أختارته هو يكون الأمل , وبجد كلمة بحبك ولا تساوي أي شئ قصاد اللي جوه مني لكي ...) بيقولوا يا أما أن لو حد عايز يسيطر علي ابن ادم يسيطر علي عقلة ثم جسدة ثم روحه , وسمر معاها التلاته فهنيئاً لها بهم ...
مقصرة معاها يا بنت بطني ؟...خلي بالك منها في الزمن ده مفيش ومبقاش وياما حذرتك ...
أه مقصرة معاها أوي , وبحاول أصلح تقصيري
صدقيني يا أما جوه القلب كتير كلام ماقدرش أقوله , وكفاية كده كفاية كلام

أجيبلك إيه وأنا جاية ؟
هاتيلي أنتي ..هاتيلي علاء أبني .. هاتيلي محمد راجلي وضنايا ,..هاتيلي سبحتي وتفسير القرأن, ..سجادة الصلاة والراديو القديم اللي دايماً بشغله علي إذاعة القرأن , هاتيلي مروة , وحفيدي , هاتيلي عمري اللي مر أوام , هاتيلي بيتي , وسريري اللي كنت وحدي عليه بنام , هاتيلي ذكرياتي , وصوره فيها أنا وأمي , هاتيلي جارتي أم غادة وسلميلي علي بنتها رشا كمان , هاتيلي جلابيتي وشبشبي وخماري اللي مروة بنتي كانت تشوفني فيه بدر التمام , .....وكفاية كده
كفاية كده ردي عليا يا ضنايا قبري خليني أنام .
وللحديث بقية

إمضاء :
ن . س