الجمعه ...يوم جميل عيد في السما و الأرض , الساعه 9 الصبح تنزل من بيتك عشان معادك في البورصه 10 رغم إنك متأكد إن صاحبك هايتأخر بس أنت بتحب تنزل دايماً في معادك ...تركب " الميكروباظ " زي ما بيقولوا عليه الناس كشكل من أشكال السخريه قالي يعني هو ده بس اللي باظ .., وكالعاده بتقعد في مكانك في الكنبه اللي ورا جنب الشباك لأن انفاسك بتروح وبتدوخ وحاجات كتير كده غريبه , وكمان لآنك بتنزل في الأخر خالص ومش عايز حد يتلزق فيك وإشي لمسه وهمسه من اللي بيستغلها الناس كتير في الميكروباظ وبالذات الرجاله الكبيره .
تشرد بعنيك لبعيد وانت بتبص من الشباك علي الزرع ولونه الأخضر الفاتح اللي بيهديك دايماً وهنا ينط في دماغك السؤال اللي بيلح عليك بقاله كذا يوم ..ياتري فعلاً بكره هاتروق وتحلي ؟ وفجأه يسود الصمت ويسرح خيالك بس يعكر صفو الموقف واحده قاعده قدامك رغايه جداً يااااااه تخليك تقرر إنك لما تنزل من العربيه تسجد لربنا أنه خلصك منها , ومن رغيها .
وأنت في طالعه الكوبري كده قبل مسرح البالون بشويه عند المكان اللي بيقعد فيه الفراشين اللي لابسين يوني فورم واحد دول تبص ماتلاقيهومش فتقول لنفسك عادي يمكن قافلين أصل انهارده الجمعه , لكن تستغرب لما تلاقي غيرهم ...3 أطفال من أطفال الشوارع ..سنهم صغير صحيح بس بالخبره واللف والدوران في الشوارع أكيد عداد عمرهم اتغير كانوا ماسكين اكياس كده وكان شكلهم والله اعلم بيشموا كوله أو الكوله هي اللي بتشمهم الله اعلم لكن الجديد في الموضوع إنك كنت تسمع إن شم الكوله بيبقي تحت الكوبري مش علني وفوق الكوبري ويوم جمعه .
نقرب بقي من الكورنيش حبيب الملايين ما شاء الله الحبيبه بيقولوا يا فتاح يا عليم انهارده هانحب في مين ؟ ..حب من الساعه 9 الصبح ليه وعشان إيه ؟ ..بس سيبك انت الكورنيش مكنش عليه ناس كتير وكان نضيف أوي حقيقي جميله يا مصر .
حمداً لله نزلت من الميكروباظ تمشي شويه في ميدان التحرير وتعدي الإشاره كالعاده وأنت كاسرها وبتطلع لسانك للعربيات وفجأه تقول لنفسك : الله هو مش أنهارده الجمعه أمال الفرانسيسكان فاتحه ليه ؟ لالا بس دي شكلها رحله ..وتبص علي أهالي التلامذه وع التلامذه نفسهم تحس إن معاك شهادة محو أميه مش بكالريوس ومن كليه محترمه كمان ...وفجأه تصدر فرمان رقم 1 في حياتك المستقبليه... " ولادي لازم يدخلوا الفرانسيسكان " , وهنا يقي نقطه ومن أول السطر .
تمشي شويه لقدام توصل كده عند جروبي تلاقي كاميرات تصوير , وناس واقفه ..الله ده يا إما إعلان يا إما فيلم , وتقول لنفسك وانت بتبتسم أبتسامه خفيفه مش عايز حد يشوفها ولا يحسها غيرك " اليوم أنهارده شكله هايبقي عالمي " .فجأه موسيقي عسكريه تشتغل تتخض أوي وتقول يمكن كل دي أوهام أو أضغاص أحلام عادي عادي كمل طريقك ..لكن الموسيقي بتزيد تبص وراك تلاقي الشارع اللي جمب جروبي متقفل وعساكر وناس بتتفرج مصريين علي أجانب تروح تتفرج عادي بقي ما هو اللي ما يشتري يتفرج ...تلاقي حاجه كده زي ماراثون وناس واقفه وعساكر , وفرقه بتعزف بس أنت مش شايف أوي تقرب أكتر وأكتر وتسأل الأخ اللي واقف جنبك وتقوله : هو في إيه ؟ يرد بكل ذوق ويقولك ده سباق عربيات .. تبص علي العربيات اللي في السبق تلاقي عليها شعار " أكتشف مصر " ... تحس ساعتها فعلاً إن أنت اللي بتكتشف مصر اللي مكنتش تعرفها , محدش عارف إيه معني السباق وليه ؟ وفين ؟ وإزاي ؟ ..والفضول جواك بيزيد تسأل واحد من العساكر اللي واقفين هو فيه إيه لو سمحت ؟ يقولك وهو بيبتسم : سباق عربيات ومنه فسحه يعني حاجه ترفيهيه كده هايطلعوا من هنا ع المعادي والدائري ومنها لشرم يقعدوا أسبوع ويرجعوا , وطبعاً حضرتك مسخسخ من جواك لأنك مش فاهم حاجه ولا حد من اللي حواليك فاهم حاجه وتقول من جواك للعسكري " يسهلوا ياعم " صحيح فعلا صدق اللي قال أكتشف مصر .
البورصه انهارده باينه من أولها وشكلها محضرالنا مفاجاَت كتير ...الساعه بقيت 10.30 والبورصه لسه قافله ليه ؟ تستغرب أوي وتزعل لأنك كنت عايز تقعد وتقرأ علي ما صاحبك يجي , بس لا مفر أرتضيت بالواقع وقررت تستني البورصه تفتح قعدت ع الأرض لآول مره ما هو الجيش قالك إيه اتصرف ..حطيت الكتاب ع الأرض وقعدت بتتفرج علي الشارع بطوله وعرضه , وأصوات الناس والعمال اللي بتملي فراغ المكان , والجو أنت مش عارف برد ولا حر لكن هوا وتراب مصر كله بقي جوه عنيك , بس إيه يعني دي مصر برضو وترابها زعفران .السعي للرزق بيبان في البورصه أوي ...الراجل اللي بيمسح الجزم , الفراشين وغيرهم كتير لسه المصري الأصيل سواء صعيدي أو فلاح ساكن للقاهره بيصرخ بالعويل مش بصوته لكن عنيه بتتكلم , لابس الجلابيه البيضا والعمه , شغال بواب أو فراش وغيره من المهن تلاقيه جاي عليك من بعيد ..شايل علي كتفه قفص العيش وماسك في أيده كيس الفول السخن , وقرطاس الطعميه اللي ريحتها تسحر لجل ما يبقي عيش وملح وتبقي لقمه علي مافسم , و نبدأ اليوم بالصلاة علي النبي .
بيكيا بيكيا ...أي حاجه قديمه للبيع ...عقول قديمه للبيع , كتب مركونه ما بتتقريش للبيع ,حريه عفي عليها الزمن للبيع ...بس المره دي بياع الروبابيكيا شاب علي غير ما أتعودنا من زمان إنه بيكون راجل لابس جلابيه ومعاه عربيه كارو جاررها حمار غلبان وهمه في عنيه بيبان , معاه مايكروفون قديم وبينده به شمال ويمين ..بيكيا بيكيا .
شاب عمال يروح ويجي قدام بنت قال إيه بيلفت نظرها عمال يتكلم في الموبايل وهو أكيد أكيد بيكلم حبيبته أو خطيبته بس هي مجرد طفاسه مش أكتر , وفجأه طاااااااخ بوووم بوم ...جزء من سطح مبني قدام البورصه الحقيقيه " بورصة الأوراق الماليه " بينهار تجري تشوف في إيه بس الحمد لله كله تمام وراجل عمال يزعق ورا كله ورا بس كله تمام الحمد لله بس طبعاً ركب سعادتك بترقص .
كل ده وانت مستني صاحبك اللي لسه مجاش ودايماً بيتأخر كالعاده وبيجي بعد معاده بساعه وشويه , وعلي طول بيتوه عن البورصه رغم أنه ادمنها ....
أما مني اللي بتتحدي الملل واللي محدش يعرف ياخد معاها لا حق ولا باطل , والقهوه اللي سيكو سيكو من تحت لتحت , والبنات والطاوله , وكورسات إزاي تعاكس واحده ست , مهرجان الليله الكبيره , وتصوير الفيلم والإعلان وتلاحم كل فئات الشعب فيه .. ولا الراجل اللي كان بيلم حتت العش من الأرض وهو علي وشه كل شوارع مصر , ومهند ونور لما عدوا من قدامك وانت قاعد ..والشواذ وعقلك اللي هايجيب جاز ..كل ده هاتعرفه المره الجايه وللحديث بقيه
Cut
ناهد سمير
